Jekaria 4 - Acoli Baibul

Okar mac tara ki yadi jeituni

¹ Lamalaika ma ceŋ obedo ka lok kweda dok obino bota, ocako co na woko, macalo gicoyo ki dano ki i waŋ nino.

² Ocako penya ni, “Ineno gin aŋo?’ Ci agamo doge ni, “Aneno okar mac tara ma kome ducu obedo jabu ki bakul i i wiye, ki tara abiro gicibo i wiye, kun tara acel acel ma gicibo i wiye-ni tye ki doge abiro.

³ Yadi jeituni aryo tye i ŋete, acel tuŋ malacuc me bakuli, ki acel mukene tuŋ acam.”

⁴ Cutcut apenyo lamalaika ma obedo ka lok kweda ni, “Magi gin aŋo kaa, ladit?”

⁵ Ci lamalaika ma obedo ka lok kweda odokka iye ni, “In pe iŋeyo jami magi?” An dok agamo bote ni, “Pe aŋeyo gira, ladit.”

⁶ En dok ogamo doga ni, “Man en aye lok ma Rwot owaco bot Jerubabel, ni, ‘Pe ki twer kadi ki teko, ento pi Cwiny mera, man lok pa Rwot me mony k ikome.

⁷ In gin aŋo kaa, in got madit?’ Ibidoko bar i nyim Jerubabel. En bikelo got me wi ot kun dano giwo ni, ‘Gum obed bote, gum obed bote!’’’.

⁸ Lok pa Rwot dok omedde ki bino bota kun wacca ni,

⁹ “Cin Jerubabel doŋ oketo guti me ot man; cine bene aye bityekone, Man bimiyo wuŋeyo ni Rwot me mony en aye muora botwu.

¹⁰ Pien ŋat ma cayo nino me lok man ok, bibedo ki yomcwiny, dok bene bineno birigi i ciŋ Jerubabel. Magi abiro-ni gin aye waŋ Rwot ma gibedo ka ŋiyo lobo ducu.”

¹¹ Anwoyo penye dok ni, “Ento yadi jeituni ma gitye tuŋ acuc ki tuŋ acam-mi ca kono gubedo gin aŋo?”

¹² Ka dok apenye tyen me aryone ni, “Jaŋ yadi jeituni aryo-ni kono gubedo gin aŋo, ma tye i ŋet paipo aryo me jabu ma moo tye ka mol ki i igi-nu?” Ka dok en openya ni, “Pe iŋeyo jami magi?”

¹³ An adokke iye ni, “Pe aŋeyo, ladit.”

¹⁴ Ka en otitta ni, “Magi jo aryo ma gityeko wirogi ki moo ma gicuŋ i ŋet Rwot me lobo ducu.”