Jekaria 2 - Acoli Baibul

Dano ma pimo piny ki tol

¹ Atiŋo waŋa malo ci aneno dano mo ma tye ki tol lapim piny i ci;ŋe!

² Dok apenye ni, “In mono ibicito wa kwene kaa?” En owacca ni, “Acito ka pimo Jerucalem, wek anen kit ma lacce tye kwede ki kit ma borre tye kwede.”

³ Lamalaika ma obedo ka lok kweda-ni ocako bino, ki lamalaika mukene bene obino ka rwatte kwede.

⁴ Ci owaco bot lawote ni, “Rin icit wa bot awobi ca iciwacce ni, ‘Jerucalem bibedo apero laboŋo cel murume, pi lwak dano ki lim makwo madwoŋ ma bibedo iye.

⁵ Pien an kikoma aye abibedo macalo cel gogo me mac ma orumogi, an aye abibedo deyone ma nen ki i iye kunnu, man lok pa Rwot kikome.’ ”

Lwoŋo opii pi dwogo paco

⁶ Wun jo-ni! Wun jo-ni! Wuriŋ, wua woko ki i lobo ma yo tuŋ acam, man lok pa Rwot kikome, pien con aketo iwu woko atata macalo yamo aŋwen me polo, man lok pa Rwot kikome.

⁷ Wun jo-ni, wulwi, wuriŋ woko wa i Cion, wun jo ma wubedo i Babilon.

⁸ Pien ŋat ma ogudo komwu noŋo ogudo pal cwiny Rwot me mony, I kare ma en Won Deyo oora bot lurok mapatpat ma yam guyakowu, en Rwot me mony owaco kuman ni,

⁹ “Koŋ wunen ba, abiyeŋo ciŋa i wigi ci gin lurok gibidoko ginayaka pa jo ma yam koŋ gubedo opii-gi. Tim macalo meno bimiyo wuŋeyo ni, Rwot me mony aye muora.

¹⁰ Doŋ wuwer ki yomcwiny, wun jo Cion; pien nen an doŋ abino ka bedo i dyewu, man lok pa Rwot kikome.

¹¹ Rok mapol gibiribbe i kom Rwot i nino meno, ci doŋ gibidoko jona. An bene abibedo i dyewu, dok wubineyo ni, Rwot me mony aye muora botwu.

¹² Rwot bigamo Juda macalo dul ma gipokke ki i lobo maleŋ; en dok biyero Jerucalem aye.”

¹³ Wuliŋ mot i nyim Rwot wun jo ducu, pien en doŋ oco woko ki i kabedone maleŋ.