Jekaria 14 - Acoli Baibul

Jerucalem ki rok mukene

¹ Nen ba, nino pa Rwot tye obebino, ma jami ma onoŋo giyako ki botwu gibipokogi woko i kinwu.

² Pien abicoko rok ducu kacel ka lweny i kom Jerucalem. Gibimayo gaŋ woko, gibiyako odi, gibimako mon gibuto kwedgi tektek, nucu jo ma i gaŋ gibiterogi woko i opii, ento jo mukene ma gudoŋ pe gibiryemogi woko ki i gaŋ,

³ Lacenne Rwot bicito ka lweny i kom rok meno ducu, kit ma lwenyo i nino me lweny.

⁴ I nino meno tyene bicuŋ i wi got me Jeituni, ma tye i nyim Jerucalem tuŋ wokceŋ; got me Jeituni bibarre iye aryo, cakke ki tuŋ wokceŋ dok kwede tuŋ potoceŋ, kun weko luŋ malac twatwal. Nucu got tuŋ cel bidok tuŋ acam, ki nucune mukene-ni bidok tuŋ acuc.

⁵ Luŋ me godina bitorre woko, pien luŋ me godi biwok ki i ŋete. Wubirino macalo ceŋ wuriŋo oyeŋyeŋ i kare pa kabaka Ujia me Juda. Lacenne Rwot Lubaŋawu bibino kacel ki jo mere maleŋ ducu.

⁶ I nino meno ŋico ki koyo bibedo pe.

⁷ Piny bibedo dyeceŋ nakanaka, Rwot ŋeyo man, pe dyeceŋ kadi dyewor, pien i otyeno ceŋ biryeny.

⁸ I nino meno pii makwo bimol kun a ki i Jerucalem, nucune bimol cito i nam ma tye tuŋ wokceŋ ki nucune mukene mol cito i nam ma tye tuŋ potoceŋ; bibedo ka timme kumeno i oro kit macalo timme kwede i cwir.

⁹ Rwot bidoko kabaka ma loyo lobo ducu. I nino meno Rwot bibedo acel kun nyiŋe bene bedo acel.

¹⁰ Lobo ducu bidoko bar, cakke i Geba o wa i Rimmon ma tye i ŋet Jerucalem yo tuŋ acuc. Ento Jerucalem bidoŋ ma odyedde kakare cakke ki i dogcel pa Benjamin o kwede wa i dogcel macon, nio i dogcel ma i twok gaŋ, ki dok cakke i lubele ma gilwoŋo Kananel o wa i bur ka ma gibiyo iye pig olok pa kabaka.

¹¹ Dano bibedo iye, pien pe dok gibidyero me ajwera woko. Jerucalem doŋ dano bibedo iye ki kuc.

¹² Man bibedo two gemo ma Rwot bipwodo ki rok ducu ma ywayo mony i kom Jerucalem: riŋo komgi bitop ma noŋo pud gicuŋ ki tyengi, wangi bitop woko ki i opoko waŋgi, ki lebgi bitop ki i doggi.

¹³ I nino meno, atiba madwoŋ ma oa ki bot Rwot bibaŋo komgi woko, man bimiyo ŋat acel acel bimako ciŋ lawote, ci doŋo lawote ki ciŋe, Ci bimiyo ŋat acel acel tiŋo ciŋe i kom lawote.

¹⁴ Koŋ inen, kadi Juda bene bilweny i kom Jerucalem. Gibicoko lonyo pa rok ducu ma tye i ŋete, macalo jabu, ryal ki ginaruka mapol ata.

¹⁵ Kit gemo macalo man bipoto i kom aguragura, kana, kinaga, ki i kom loo ducu ma i gony meno.

¹⁶ Ŋat acel acel ma obwot ki i kom rok ducu ma gubino ka lweny i kom Jerucalem, bibedo ka wot i Jerucalem mwaka ki mwaka ka woro Kabaka, ma en Rwot me mony, ki pi kwero nino madito me bolo.

¹⁷ Ka ce jo me kaka mo me wi lobo pe bicito i Jerucalem ka woro Kabaka, Rwot me mony, kot pe bicwe botgi.

¹⁸ Ka ce jo me doggola me Ejipt pe ocito, ma pe onen kunnu, gemo ma yam Rwot ouno ki rok ma pe gucito ka kwero nino madito me bolo-ni bipoto i komgi.

¹⁹ Man aye kit ma gibiculo ki bal me Ejipt, ki kit ma gibiculo ki bal pa rok ducu ma pe gucito ka kwero nino madito me bolo.

²⁰ I nino meno gibigoro coc i kom olaŋ pa aguragura ni, “Maleŋ pi Rwot.” Agulu ma tye i ot pa Rwot bibedo macalo becen ma tye i nyim keno tyer,

²¹ Agulu ducu ma tye i Jerucalem ki Juda gibikwerogi bedo maleŋ pi Rwot me mony, wek jo ducu ma gityero gitum bot Lubaŋa gubin gukwany ki i kingi, guted ki riŋo lee ma gityero bot Lubaŋa, Lacat-wil mo pe dok binen i ot pa Rwot me mony i nino meno.