Jekaria 13 - Acoli Baibul

¹ “I nino meno gibituco waŋ it pi jo me ot pa Daudi kacel ki pi jo ma gibedo i Jerucalem, wek gilwok bal ki keni ducu woko ki i komgi.

² “I nino meno, man lok pa Rwot me mony kikome, abiŋolo nyiŋ cal jogi ducu woko ki i lobo, wek wi dano pe dokopo i komgi; dok bene abikwanyo lunebi kacel ki cen maraco woko ki i lobo.

³ Ka ce ŋat mo pud tito lok macalo lanebi, ci wonne ki minne ma gunywale gibiwacce ni, ‘Pe ibibedo kwo, pien iloko lok me goba i nyiŋ Rwot’; ci wonne ki minnema gunywale gibicobe woko pil ka ce en bitito lok macalo lanebi.

⁴ I nino meno lewic bimako lanebi acel acel pi ginanyutane ma en tito pire macalo lanebi. En pe biruko boŋo ma obedo yer yer me bwolo jo,

⁵ ento en biwaco ni, ‘An gira pe lanebi, an abedo lapur poto, pien poto man obedo mera ocakke wa ka tinona.’

⁶ Ka ŋat mo openye ni, “Lwak bur ma tye i ŋeyi-ni kono, gin aŋo mutimo?” En bidok iye ni, ‘meno ducu ret me waŋ odoo ma gigoya kwede ki i ot pa lurema.’ ”

⁷ “In pala lucwan, co woko lweny i kom lakwatta i kom dano ma ocuŋ ka ŋeta,” man Rwot me mony aye owaco. Go lakwat, wek romi guket woko ata. Abicwalo ciŋa wa i kom jo matinone.

⁸ I lobo man ducu, man Rwot aye owaco, dul jo aryo me adek gibinekogi woko, acel me adekke aye bidoŋ makwo.

⁹ Dul man me acel me adek abiketo imac, abiliyo kit ma dano liyo ki ryal, abitemogi kit ma dano temo ki jabu. Gibilwoŋo nyiŋa, ci abigamo doggi. Abiwacci, ‘Gin aye jo mera’; gin gibigamo ni, ‘Rwot en aye Lub