Jekaria 12 - Acoli Baibul

Laro Jerucalem i kare me anyim

¹ Lok ma pire tek. Man lok pa Rwot i kom Icrael: Rwot ma cen oryeyo polo, dok oketo guti me te lobo, ma oketo cwiny dano i i dano, owaco kuman ni,

² “Nen acok miyo Jerucalem doko kikopo ma mero rok ducu ma tye i ŋete, I Juda bene lukwor gibirumo Jerucalem,

³ I nino meno abimiyo Jerucalem bedo got mapek twatwal bot rok ducu; jo ducu ma gibitiŋo gibilimo ret marac. Rok ducu me wi lobo biribbe kacel me lweny i kome.

⁴ I nino-nu abibano kom aguragura ducu, ki jo ma riŋo kwedgi gibidoko lupoya. Ento abiyabo waŋa i kom ot pa Juda i kare ma abicoro waŋ aguragura pa lurok ducu.

⁵ Ka doŋ kaka me Juda bilok i cwinygi kekengi ni, ‘Jo ma gibedo i Jerucalem gitye ki tek ma oa bot Rwot me mony ma Lubaŋagi.’

⁶ “I nino meno abimiyo kaka me Juda bedo macalo otako ma mac tye ka lyel iye i dye yen, nyo macalo mac raa ma lyel i kin ren kal. Gibiwaŋo rok ducu ma tye i ŋetgi, ma tye tuŋ lacuc ki tuŋ lacam, ento Jerucalem pud bidoŋ kakare kun jo mere gibedo iye.

⁷ “Rwot bikwoŋo miyo loc i kema pa Juda, wek deyo me ot pa Daudi ki deyo pa jo ma gibedo i Jerucalem pe obed dit makato pa Juda,

⁸ I nino meno Rwot bigeno jo ma bedo i Jerucalem ki kwot, mi yo dano magoro i kingi bibedo calo Daudi, ki ot pa Daudi bibedo calo Lubaŋa, macalo lamalaika pa Rwot ma telo nyimgi,

⁹ Doki nino meno abiketo tek me jwero rok ducu ma gibino ka lweny i kom Jerucalem.

¹⁰ “Abionyo cwiny me kica ki cwiny me bako dog i kom ot pa Daudi ki i kom jo ma bedo i Jerucalem, wek ka gineno ŋat ma gicobo, ci gikum pire, macalo ŋat ma kumo pi latinne acel keken ma en onywalo, kun kok matek macalo dano ma koko latin kayo.

¹¹ I nino meno kumo bibedo dit twatwal i Jerucalem ma rom ki kumo pi Adad-rimmon i bar me Megido.

¹² Lobo bikumo, kun jo me doggola acel acel kumo pigi kengi; jo me ot pa Daudi pat kun noŋo mongi bene kumo pat; jo me ot pa Natan pat kun mongi bene kumo pat;

¹³ jo me ot pa Levi pat kun mongi bene kumo pat; jo me doggola pa Cimei pat kun mongi bene kumo pat.

¹⁴ Ki jo ducu me doggola mukene ma gudoŋ, acel acel bikumo pigi kengi, kun mongi bene gikumo kengi pat.