Jabuli 99 - Acoli Baibul

Rwot aye kabaka ma loyo ducu

¹ Rwot tye ka loc, wek rok ducu komgi omyel! En obedo i WI komker mere ma gicibo i wi lukerubi; wek lobo oyeŋŋe!

² Rwot dit i Cion; en loyo lwak me rok ducu.

³ Wek gin ducu gipak nyiŋi madit me deyo ma kelo lworo! En ŋat Maleŋ!

⁴ Kabaka matek, ma maro ŋolo kop kakare, in aye ma ikelo ŋolo kop maromrom: ikelo ŋolo kop kakare ki kit ma atir, imiyo omoko matek i kin jo pa Yakobo.

⁵ Wudwor Rwot Lubaŋawa, wuwore i nyim kom me teno tyene. En ŋat maleŋl

⁶ Moses ki Aron bene onoŋo gubedo tye i kin ajwagine, Camuel bene onoŋo tye i kin jo ma gilwoŋo nyiŋe, Gukok bot Rwot, ci Rwot ogamo doggi.

⁷ Oloko kwedgi ki i wir pol; gugwoko lok me cadenne, ki cik ma en omiyo botgi.

⁸ Ai Rwot Lubaŋawa, in ceŋ igamo doggi, ibedo botgi Lubaŋa ma lawek bal, ento ibedo laculkwor me gin marac ma gutiyo.

⁹ Wudwor Rwot Lubaŋawa, dok wuwore i wi got mere maleŋ; pien Rwot Lubaŋawa leŋ.