Jabuli 98 - Acoli Baibul

Pako Lubaŋa pi porrene

¹ Wuwer bot Rwot wer manyen, pien doŋ otyeko tiyo jami me aura! Ciŋe ma lacuc ki bade maleŋ okelo bote loc.

² Rwot doŋ omiyo locce oneŋe, doŋ otyeko nyuto porrene ka maleŋ i nyim lurok ducu.

³ En opo i kom mar mere ma pe lokke kacel ki genne bot jo me ot pa Icrael, Agikki piny me wi lobo ducu doŋ oneno loc pa Lubaŋawa,

⁴ Wudaŋŋe ki yomcwiny nyim Rwot, wun lobo ducu; wupake ki wer kun wudaŋŋe ki yomcwiny.

⁵ Wuwer wer me pak bot Rwot ki opuk; wuwer kun wugoyo ki opuk ki dwan mamit!

⁶ Wukut tum ki obute, wudaŋŋe ki yomcwiny i nyim kabaka, ma en aye Rwot!

⁷ Wek nam omor, ki gin mupoŋ iye, lobo kacel ki jo ducu ma bedo iye!

⁸ Wek lalele omol otagge, wek godi ducu guwer kacel ki yomcwiny

⁹ i nyim Rwot, pien obebino ka ŋolo kop i kom lobo. En biŋolo kop ma atir i kom lobo, biŋolo kop pa lwak me rok ducu maromrom.