Jabuli 97 - Acoli Baibul

Ker ki twero pa Rwot

¹ Rwot tye ka loc; wek lobo obed ki yomcwiny; wek lobo ma i dog nam ducu cwinygi obed yom!

² Pol ki mutu mucido licuc ogure woko dyere; kit ma atir ki ŋolo kop ma tye atir aye miyo komkerre cuŋ matek.

³ Mac telo nyime, waŋo lumerokke ma gugure dyereni woko.

⁴ Lutkotte mil menyo lobo; lobo neno ci yeŋŋe.

⁵ Godi leny i nyim Rwot calo odok kic, i nyim Rwot me lobo ducu.

⁶ Polo tito porrene; lwak me rok ducu gineno deyone.

⁷ Jo ducu ma woro cal jogi ma gipayo lewic omakogi, jo ma wakke pi cal jogi ma gupayo; lwak lubaŋa-gu ducu giryebbe piny i nyime.

⁸ Jo Cion giwinyo ci gibedo ki yomcwiny, anyira Juda ducu cwinygi yom ma pe twerre, pi kop ma iŋolo, ai Lubaŋa.

⁹ In ŋat mamalo twal i wi lobo ducu, ai Rwot; in i dit ikato lubaŋa-gu ducu.

¹⁰ Rwot maro jo ma dag gin marac; en gwoko tipo pa jone ma gene; en larogi woko ki i ciŋ jo maraco.

¹¹ Ceŋ ryeny pi jo ma kitgi atir, yomcwiny bene tye pi jo ma cwinygi atir.

¹² Wubed ki yomcwiny i Rwot, wun jo ma kitwu atir, wupwo nyiŋe maleŋ!