Jabuli 96 - Acoli Baibul

We-rme pak

¹ Wuwer bot Rwot wer manyen; wuwer bot Rwot, wun lobo ducu!

² Wuwer bot Rwot, wupwo nyiŋe; wutit pi larre nino ducu.

³ Wutuc deyone bot lurok wutit ticce me aura bot rok ducu!

⁴ Rwot aye dit, myero gipake twatwal myero gilwore makato lubaŋa mukene-gu ducu,

⁵ Pien lubaŋa pa lurok ducu gin cal jogi apaya, ento Rwot aye oketo polo.

⁶ Deyo ki dit tye bote tek ki ber tye i kabedo mere maleŋ,

⁷ Wun kaka me rok ducu, wumi deyo bot Rwot, wumi deyo ki tek bot Rwot!

⁸ Wumi deyo bot Rwot muporo nyiŋe; wukel gityer, wubin wa i dyekalle!

⁹ Wuwor Rwot ki, boŋo maleŋ; komwu omyel i nyime, wun lobo ducu!

¹⁰ Dano guwac i kin lurok ni, “Rwot tye ka loc! Ada, lobo ocuŋ matek ma pe yeŋŋe; en biŋolo kop i kom dano maromrom.”

¹¹ Polo iye obed yom, lobo bene obed ma cwinye-yom, wek nam omor, ki jami ducu ma tye iye;

¹² wek poto obed ki yomcwiny, ki jami ducu ma tye iye! Man bimiyo yadi ma i buŋa ducu, giwero wer pi yomcwiny

¹³ i nyim Rwot, pien obebino ka ŋolo kop ki lobo. En ‘biŋolo kop ma tye atir i kom lobo; biŋolo kop i kom rok ducu ki adane.