Jabuli 95 - Acoli Baibul

Wer me pak pi woro Lubaŋa

¹ Wubin wawer bot Rwot; wek cwinywa yom kom got ma larowa!

² Wabin i nyime ka miyo pwocwa; Wawer bote wer me pak ki yomcwiny!

³ Rwot aye en Lubaŋa madit, en kabaka madit makato lubaŋa-gu ducu.

⁴ Nota me lobo tye i twerone; lacol wi godi gin mere bene.

⁵ Nam mere pien en muti yo, lobo bene en ma ocweyo ki ciŋe.

⁶ Wubin, waryebbe piny wawore, warumu conwa i nyim Rwot ma oketowa.

⁷ Pien en aye Lubaŋawa, wan wa jone ma en aye ma kwayowa, dok wan romi ma en aye gwokowa. Ka kono tin wun wuwinyo dwane!

⁸ Pe myero wumi cwinywu obed nwaŋ macalo yam wutimo i Meriba, macalo wutimo i kare ma wutye i Maca i tim.

⁹ I kare meno kwarowu yam gutema, guporo kit ma kwona tye kwede, kadi bed guneno tic ma atiyo pigi ki waŋgi,

¹⁰ Cwinya okwero lwak meno woko pi mwaka pyeraŋwen; omiyo awacci, “Gin lwak ma guŋak woko ki i cwinygi, pe gilubo cikka.”

¹¹ Mumiyo akwoŋo kwoŋ ki kiniga, ni pe myero gudony i lobo ka ma an abimiyogi iye yweyo.