Jabuli 94 - Acoli Baibul

Lega pi culo kwor

¹ Ai Rwot, in Lubaŋa ma lacul kwor, in Lubaŋa ma lacul kwor, ryeny imeny piny,

² A malo, in laŋolkop me lobo; cul kwor i kom jo ma wakke muporo timgi.

³ Jo maraco gibilyerre pi kare ma rom mene, pi kare ma rom mene, ai Rwot?

⁴ Giloko lok me cac ki wakke, lutim maraco ducu gin jo ma luwakke.

⁵ Giŋinyo joni woko, ai Rwot, gibalo joni kikomi.

⁶ Gineko mon to ki jo ma gin lubedo, gineko wa litinokic-gu.

⁷ Giwaco ni, “Rwot pe neno; Lubaŋa pa Yakobo pe keto cwinye iye.”

⁸ Wuniaŋ, wun jo ma wiwu pe tiyo! Wun lumiŋ mono wubidoko ryek awene?

⁹ En ŋat muketo it mono pe winyo? En Ŋat mucweyo waŋ kono pe neno?

¹⁰ En ma pwodo lurok, pe bipwodowu? En ma pwonyo dano ki ryeko, pe ŋeyo gin mo?

¹¹ Rwot ŋeyo tam pa dano, ni gicalo alur dog me yweyo keken.

¹² Dano ma in itiro tye ki gum, ai Rwot, dano ma ipwonyo ki lok me cikki,

¹³ wek oywe i kare me can, nio waŋ ma gikwinyo bur pi jo maraco.

¹⁴ Rwot pe bibwoto jone, pe biweko jo ma gin mere kikome.

¹⁵ Gibiŋolo kop atir pi jo ma kitgi atir, jo ma cwinygi atir gibilubo.

¹⁶ Aŋa ma twero tiŋŋe i kom jo maraco? Aŋa ma bicuŋ ma kakara i kom lutim maraco?

¹⁷ Ka kono Rwot pe okonya, tipona kono oliŋ woko licwic i lobo me liŋo.

¹⁸ I kare ma atamo ni, “Tyena ocer,” mar meri ma pe lokke otiŋa malo, ai Rwot.

¹⁹ Ka atamo pi jami mapol, in ikweyo cwinya ki kicani,

²⁰ Jo maraco ma gin luloc gitwero ribbe kwedi niŋniŋ, ma giloko lok marac doko cik?

²¹ Gicokke kacel ka neko dano ma kite atir, gujolo kop me to i kom dano ma pe ki bal.

²² Ento Rwot aye doŋ cella, en got me kalarrena.

²³ En bidwoko balgi i wigi kengi, ci bityekogi woko pi timgi maraco; Rwot Lubaŋawa bityekogi woko.