Jabuli 92 - Acoli Baibul

Wer me pako Rwot pi berre

¹ Miyo pwoc bot Rwot en gin maber, wero wer me pako nyini bene en gin maber, ai In Mamalo Twal.

² Tuco mar meri ma pe-lokke odiko, ki nyuto adani otyeno bene ber,

³ kun gigoyo naŋa ki gitta, ma gilubo dwan opuk bene.

⁴ Pien in, ai Rwot, pi ticci me aura ma itiyo omiya yomcwiny, pi tic ma itiyo miyo awero wer ki yomcwiny,

⁵ Ticci dit tom mene, ai Rwot! Dok tammi tut rom mene!

⁶ Dano ma lamiŋ pe twero ŋeyo lok man, dano ma wiye odiŋ pe twero niaŋ i kom lok man, ni,

⁷ kadi lubal gidoŋo macalo lum, dok kadi lutim maraco gibedo ki kwo maber, ento gibityekogi woko matwal.

⁸ Ento in, ai Rwot, ibedo dit nakanaka,

⁹ Lumerokki, ai Rwot, ada gibinekogi woko liweŋ, jo ducu ma gin lutim maraco gibiketogi woko ata.

¹⁰ Imiyo adoko tek macalo jubi ma i tim, ityeko wira woko ki moo manyen.

¹¹ Atyeko neno can ma poto i kom lukworra ki waŋa, dok atyeko winyo ki ita kit ma giloyo kwede jo maraco ma onoŋo gutinne i koma.

¹² Jo ma kitgi atir gidoŋo calo yadi otit, gidoŋo maboco calo yadi cedar me Lebanon.

¹³ Gipitogi i ot pa Rwot, gituru i dyekal me ot pa Lubaŋawa.

¹⁴ Kadi guti ento pud gibinyak, piggi bibedo dwoŋ miyo pe gibiner.

¹⁵ Man binyuto ni Rwot cwinye atir en gotta ma pe tiyo gin mo marac.