Jabuli 91 - Acoli Baibul

Lubaŋa aye lagwokwa

¹ Dano ma bedo i kakanne pa En Mamalo Twal, ki ma bedo i te gwok pa Won Twer Ducu,

² biwaco bot Rwot ni, “In kalarrena ki cella, in Lubaŋana ma ageno.”

³ En aye ma bilari ki i owic pa ladwar, ki i two gemo marac ma neko dano.

⁴ En biumi ki bwome, ibiriŋo ka larre i te bwome, adane en kwot ki gin ma geŋo kori.

⁵ Pe ibilworo gin marac i dyewor, nyo kadi atero ma gicelo dyeceŋ,

⁶ kadi two gemo ma neko dano atura i colpiny, nyo can ma poto nekogi i dyeceŋ.

⁷ Jo alip apar gitwero to ka ŋeti, ki jo alip i tuŋ ciŋi ma lacuc; ento gin mo pe bigudo komi.

⁸ Ibibedo caden keken, ibineno kwor ma giculo i kom lutim maraco ki waŋi.

⁹ Inoŋo Rwot doŋ odoko kalarreni, En Mamalo Twal doŋ odoko kabedoni.

¹⁰ Can mo pe bipoto i komi, kit gemo mo bene pe bibino cok ki kemani.

¹¹ Lubaŋa biciko lumalaikane piri me gwoki ka ma iwoto iye ducu.

¹² Gibijoli ki ciŋgi, wek pe iyok tyeni i kom got.

¹³ Ibinyono labwor ki ororo, ibitoro latin labwor ki twol piny i nom ki tyeni.

¹⁴ Kit macalo en onyuto marre i koma, abilare; abigwoke, pien en ŋeya.

¹⁵ Ka okok bota, abigamo doge; abibedo kwede i kare me ayelayela, abilare dok abiketo deyo i kome.

¹⁶ Abikweyo cwinye kun amiye eri i lobo pi mwaka mapol, abimiyo en ŋeyo ni an lalar dano.