Jabuli 9 - Acoli Baibul

Wer me pwoyo Lubaŋa pi ŋolo kop atir

¹ Abipaki, ai Rwot, kun amiyi pwoc ki cwinya ducu, abitito pi jami me aura-gu ducu ma itiyo.

² Abiwero wer ki yomcwiny kun anyatte piri. Abiwero wer me pako nyiŋi, in ŋat Mamalo Twal.

³ Lukworra gilokke gidok cen ka guneno in ituc; gigatte gipoto piny gito woko.

⁴ In laŋolkop ma oolo kop atir, ibedo i wi komkerri, ci iŋolo koppa kakare.

⁵ In ijuko lurok, dok ityeko jo maraco woko liweŋ; ityeko jwayo nyiŋgi woko ducu, pe doŋ gibipo i komgi matwal.

⁶ Lukworra doŋ gutum woko matwal; ijwero gaŋigi woko ducu, wi dano doŋ otyeko wil woko i komgi adada,

⁷ Ento Rwot en kabaka ma bedo i wi komkerre nakanaka; en ocibo komkerre pi oolo kop.

⁸ En loyo lobo ki kit ma atir, ci oolo kop pa lwak me rok ducu kun tiyo ki dano maromrom.

⁹ Rwot en ka larre pa jo ma piny obwoyogi, en cel matek ma gwokogi maber i kare me ayela.

¹⁰ Rwot, jo ma neyi gibiketo gengi i komi; pien in pe ibwoto jo ma gibino boti.

¹¹ Wuwer wer me pak bot Rwot, ma tye ka loc i Cion! Wutuc gin ma en otiyo bot lwak me rok ducu!

¹² Lubaŋa ma lacul kwor me remo po pi jo ma can omakogi; wiye pe wil i kom kokogi, dok pwodo jo ma gitimogi rac.

¹³ Kica omaki i koma do, ai Rwot! Nen kit atwom ma jo ma gidaga gutyeko keto i koma! In aye ma ilara iila malo ki i to,

¹⁴ wek imiya acuŋ i nyim jo Jerucalem, wek atit botgi gin ducu mumiyo apako nyiŋi. Abibedo ki yomcwiny pien doŋ ilara.

¹⁵ Lurok gukwinyo bur ka dok gupoto iye kekengi; guciko obwo ci tyengi kekengi aye omoko iye.

¹⁶ Rwot doŋ otyeko miyo nyiŋe oŋene pi ŋolo kop atir, jo maraco gimoko i owic pi tim ma gin aye gutimo.

¹⁷ Jo maraco ducu gibito giyikogi i lyel, gin lurok ducu ma gikwero Lubaŋa,

¹⁸ Jo ma piny obwoyogi pe gibiwekogi ata kare ducu; ki gen pa lucan bene pe birwenyo woko matwal.

¹⁹ Bin, ai Rwot! Wek dano pe oloyi! Lwoŋ lurok gucokke i nyimi wek iŋol kop i komgi.

²⁰ Ai Rwot, mi lworo omakgi; wek guŋe ni gin dano adana mamwa.