Jabuli 89 - Acoli Baibul

Lubaŋa oketo gicikke i kin co ki Daudi

¹ Ai Rwot, abiwero wer nakanaka pi mar meri ma pe lokke; abituco pi genni ki doga bot jo me yalwak ducu.

² Aŋeyo ni mar meri ma pe lokke bedo matwal, genni bene tye ocuŋ woko likiŋ calo polo,

³ Iwacci, “Doŋ aketo gicikke ki dano ma ayero, akwoŋo kwoŋ bot laticca Daudi ni,

⁴ ‘Abimoko likwayi gibedo matwal, dok abiketo komkerri cuŋ pi kare pa yalwak ducu.’

⁵ Ai Rwot, wek lwak ma i polo gupaki pi taŋo me aura ma doŋ ityeko tiyogi-ni, wek guwer bene pi genni i cokke pa joni maleŋ!

⁶ Pe tye ŋat mo i polo ma gitwero poro ki Rwot; pe tye mo kadi acel i kin lwak me polo ma rom kwedi, Rwot.

⁷ In aye Lubaŋa ma gilworo i cokke pa jo maleŋ, in idit dok iger iloyo jo ducu ma gurumi woko-ni.’

⁸ Ai Rwot Lubaŋa me mony, aŋa ma tek calo in? In lagen ijami ducu, ai Rwot.

⁹ Iloyo wa biamwonyi me nam ma twagge; ka biamwonyine otwagge, ikweyogi woko cut,

¹⁰ Inyono Rakab piny ineko woko calo inyono geŋ lee muto, ikeyo lukworri woko ducu pi tek me badi.

¹¹ Polo ki lobo ducu meri; lobo ki jami ducu ma tye iye in aye ma iketogi.

¹² In aye ma iketo lobo ma tuŋ acam ki ma tuŋ acuc; got Tabor ki got Kermon gipako nyiŋi ki yomcwiny madwoŋ.

¹³ It ye ki twero madit mada; tekki dwoŋ, ciŋa ma lacuc oille malo.

¹⁴ Icibo komkerri i kom kit ma atir ki ŋolo kop kakare; mar ma pe lokke, ki gen, tye i gin ducu ma itiyo.

¹⁵ Gitye ki gum jo ma giwori kun giwero boti wer ki dwan maloŋo, ma giwoto i ceŋ me kicani, ai Rwot.

¹⁶ Gibedo ki yomcwiny piri dyeceŋ jwi, ma gidwori pi kiti muporre.

¹⁷ In aye ma imiyogi tek miyo gibedo ki deyo; pi berri botwa miyo tekwa bene tiŋŋe malo.

¹⁸ In aye i kwot ma gwokowa, ai Rwot; in ŋat Maleŋ pa Icrael imiyo botwa kabaka.

¹⁹ Yam con iloko ki laticci ma lagen i lek, kun iwacci, “Aketo lalukana i kom dano ma tye ki tek, amiyo ŋat ma ayero ki i kin lwak obe do i wi komker.

²⁰ Ayero laticca Daudi, awire kimoona maleŋ, aketo obedo kabakawu.

²¹ Tekka bibedo bote kare oucu, twerona bimiyo en bedo tek.

²² Lukworre pe gibibwole, dok jo maraco pe gibiloye bene.

²³ Abinyono lukworre woko piny ki i nyime, dok aneko jo ma dage woko liweŋ,

²⁴ Abibedo kwede ki gen kun amare ki mar mera ma pe lokke, dok abimiye tek me loyo lukworre pi nyiŋa,

²⁵ Abimedo kerre nia ki i nam madit nio wa i kulu Euprate.

²⁶ En bilwoŋa ni, ‘In i Wora, ki Lubaŋana; in aye Got me kalarrena.’

²⁷ Abiloko en bedo latin kayo, kabaka madit makato luker ducu ma i wi lobo-ni.

²⁸ Abigwoko mar mera ma pe lokke nakanaka pire, dok gicikkena pire bicuŋ likiŋ.

²⁹ Abimiyo lakwarre bedo kabaka kare ducu; dok abimoko komkerre bedo matwal macalo pol.

³⁰ “Ka ce likwaye gibibwoto cikka, ma gibedo kun pe gilubo gin ma aciko;

³¹ ka ce guturo cikka ma pe gilubo cik ma amiyogi,

³² ci abipwodogi ki odoo pi balgi; can madwoŋ adada bipoto i komgi pi balgi.

³³ Ento pe abikwanyo mar mera ma pe lokke woko ki i kome, pe abibwoto adana me kwanyo genna woko ki i kome.

³⁴ Pe abituro gicikkena, nyo kadi loko kit lok ma yam doŋ atyeko lokone.

³⁵ “Doŋ akwoŋo kwon kicel ma bedo matwal ki nyina maleŋ; pe abiloko lok goba bot Daudi.

³⁶ Kare ducu Likwaye bibedo tye, dok abigwoko kerre bedo nakanaka calo ceŋ ma ryeny i nyima.

³⁷ Bibedo nakanaka ma omoko woko likiŋ calo dwe ma tye i kabedone, bicuŋ woko matek likiŋ calo polo ma oyarre malo.”

³⁸ Ento kombeddi kiniga omaki i kom kabaka ma in aye iwiro ki moo; doŋ itenye woko liyak dok ikwere woko adada.

³⁹ Ityeko weko gicikkeni woko ki laticci, ibolo lalukanane i apwa ibalo woko.

⁴⁰ Ityeko muko cel me gaŋŋe woko ducu; cel gogone-gu ducu doŋ ireto woko piny odoko obur.

⁴¹ Jo ma giwok ki i ŋete giyako jamine; doŋ odoko gin me aŋala bot luwote ma gibedo cok kwede.

⁴² In doŋ imiyo loc woko bot lumonene; imiyo gin ducu gubedo ki yomcwiny.

⁴³ Iyo, iloko lak pala lucwanne odoko gin ma konnye pe, imiyo giloye woko i lewny.

⁴⁴ Ikwanyo odoo kerre woko ki i ciŋe, ka ikwanyo komkerre ituro ibolo woko piny i nom.

⁴⁵ Imiyo oteggi oti woko ma pud en tidi, ci ileyo wiye woko.

⁴⁶ Ai Rwot, ibikanne woko matwal? Nyo pi kare ma rom mene? Dok akemoni bibedo ka waŋ calo mac pi kare ma rom mene?

⁴⁷ Ai Rwot, po i kom kit ma kare me kwo pa dano nok kwede, dok ipo ni dano ma iketo-gu ducu mwa!

⁴⁸ Aŋa ma twero bedo kun pe to? Dok aŋa ma twero larre kene ki i twer me Lyel?

⁴⁹ Rwot, tic ducu ma yam itiyo, ki mar meri ma pe lokke-ni, doŋ gitye kwene? Genni ma ikwoŋo kwede kwon bot Daudi-ni kono tye kwene?

⁵⁰ Ai Rwot, po i koma an laticci, nen kit maginala kwede. Nen kit ma atye ka ciro kwede yet pa lwak me rok ducu.

⁵¹ Ai Rwot, nen kit ma lukworri giloko kwede lok aŋec, kun bene giŋalo dano ma in aye iwiro ki moo i kabedo ducu ma en woto iye.

⁵² Gipwo Rwot nakanaka! Amen dok Amen!