Jabuli 83 - Acoli Baibul

Lega pi tyeko lukwor pa jo Icrael woko

¹ Ai Lubaŋa, pe iliŋ; pe ibed mot ki kuc ma iliŋ woko, ai Lubaŋa!

² Nen lukworri gitye ka timo gin marac; jo ma gidagi-ni doŋ gujemo woko.

³ Gitye ka yubo yub mogo i muŋ i kom lwakki; gicokke kacel giporo lok i kom joni ma doŋ igwokogi woko-ni.

⁴ Giwacci, “Wubin, wek watyek rokgi woko; wek pe doŋ gipo pi nyiŋ Icrael matwal!”

⁵ Iyo, gin ducu gipiro lok ki cwiny acel; dok bene giketo gicikke i kingi me lweny i komi.

⁶ Gin jo Edom, ki jo Icmael, jo Moab ki jo Agri,

⁷ jo Gebal, jo Ammon ki jo Amalek, jo Piliciti ki jo ma gibedo i Turo.

⁸ Jo Aciria bene onoŋo guribbe kwedgi; gin aye dul mony matek pa likwayo pa Lot.

⁹ Tim gin ma itimo i kom jo Midian-ni i komgi, macalo itimo i kom Cicera ki Jabin i dog kulu Kicon,

¹⁰ ma gityekogi woko i En-dor, ma gudoko macalo cet dyaŋ ma gionyo i poto.

¹¹ Mi luditogi me awora gubed calo Oreb ki Jeeb, dok ilo rwodigi woko macalo iloyo Jeba ki Jalmuna;

¹² ma guwacci “Wek wakwanyu obed piwa kenwa, en olet pa Lubaŋa-ni.”

¹³ Ai Lubaŋana, mi gubed macalo apwa ma yamo lapiru kolo, calo cuŋ kaŋ ma yamo tero.

¹⁴ Kit macalo mac waŋo kwede buŋa, dok macalo leb mac ma tye ka lyel i wi godi,

¹⁵ in bene ibiryemogi ki yamo matek gicito woko kit meno, ci ibimiyo yamo lapiru mager kodo miyogi lworo ki myelkom.

¹⁶ Mi lewic omakgi, ai Rwot; wek gulokke guyenyi ci guti boti.

¹⁷ Wek giket lewic i komgi dok omi cwinygi oballe woko, wek guto i can ki lewic madwoŋ,

¹⁸ Wek guŋe ni, in keni aye ma nyiŋi Rwot, in aye ŋat Mamalo Twal ma loyo wi lobo-ni ducu.