Jabuli 82 - Acoli Baibul

Lubaŋa laloc madi makato ducu

¹ Lubaŋa doŋ obedo i wi komme i kacokke i wi polo, ci ŋolo kop i dye lwak lubaŋa ma gugurre, kun wacci,

² “Pe wubinolo kop kakare pi kare ma rom mene, kun wudworo kor jo maraco?

³ Wuŋol kop pa lugoro ki pa jo ma wongi pe; wutim jo ma tre ki can ki jo ma doŋ piny obwoyogi adada muporo kwogi.

⁴ Wular lugoro ki jo ma piny obwoyogi; wulargi ki i ciŋ jo maraco.”

⁵ Pe gitye ki ŋec, dok niaŋ mo bene pe, giwoto megi ata i colpiny; te guti me lobo ducu tye ka yeŋŋe.

⁶ Awacci, “Wun wubedo lubaŋa, wun ducu litino pa ŋat Mamalo Twa!

⁷ Kadi bed kumeno, wubito macalo dano, dok bene wubipoto macalo rwot mo keken.”

⁸ A malo, ai Lubaŋa, iŋol kop i kom lobo; rok ducu ma i wi lobo-ni meri.