Jabuli 80 - Acoli Baibul

Lega pi roco rok me Icrael odok manyeo

¹ Winywa, in lakwat pa jo Icrael, in ma itelo wi jo pa Yucepu macalo itelo wi lwak romi! In ma ibedo i wi komkerri i kom lukerubi, ryeny menypiny

² I nyim kaka pa Epraim, pa Benjamin ki pa Manace! Nyut tekki, ci ibin ilarwa!

³ Dwokwa cen boti, ai Lubaŋa; nenwa ki waŋ me kica ci wabilarre!

⁴ Ai Rwot Lubaŋa me mony, ibibedo ki kiniga i kom lega pa lwakki pi kare ma rom mene?

⁵ Imiyo wacamo pig wanwa macalo wacamo kwon, imiyowa pig waŋ poŋ kikopo madit niwamati.

⁶ Imiyo jo ma bedo i ŋetwa doŋ gicayowa marac; ki lukworwa bene ginyerowa anyera i kingi kengi,

⁷ Dwokwa cen boti, ai Lubaŋa; nenwa ki wan me kica ci wabilarre!

⁸ In aye ma yam ikelo tyen olok ki i Ejipt; ka iryemo lurok woko ki, i lobogi ci ipito iye olokki,

⁹ Ipurokakare woko maber, ci oroyo Lwite odonyo matut i ŋom, omiyo odoŋo oumo lobo woko ducu.

¹⁰ Tipone oumo godi woko ducu, oumo bene wa yadi cedar madito ki jaŋe-gu,

¹¹ Jaŋe ojany oo wa i nam, ki pote ma pud lot alota oo wa i kulu Euprate.

¹² Piŋo imuko cel marumo-gu woko, iweko jo ducu ma kato ki kenyo gupwono nyige?

¹³ Opego ma gibedo i buŋa ginyono woko piny, ki lee tim ducu gicamo.

¹⁴ Lokke idwog botwa, ai Lubaŋa me mony! Nen piny ki i polo ci inenwa; bed ki tam i kom olok man,

¹⁵ bin ilar tyen olok man ma in aye ipiro-ni,

¹⁶ Gutyeko wanone woko ki, mac, dok bene gutoŋo gureto woko piny; nengi ki kiniga ityekgi woko!

¹⁷ Ket ciŋi i kom dano ma tye i ŋeti tuŋ lacuc, en dano ma imiyo odoŋo odoko matek-ki!

¹⁸ Pe doki wabilokke-wabwoto in; gwokwa wabed kwo, ci wabipako nyiŋi.

¹⁹ Dwokwa cen boti, ai Rwot Lubaŋa memony, nenwa ki waŋ me kica ci wabilarre!