Jabuli 77 - Acoli Baibul

Kweyo cwiny i kare me can

¹ Akok matek bot Lubaŋa, akok bote, matek, ci en winyo kokona.

² Ayenyo Rwot i kare ma atye ki can; i dyewor ataŋo ciŋa bote kun alego ma pe aol; ento meno ducu mwa, cwinya pe romokwe.

³ Aparo pi Lubaŋa kun acur; alwodo lok, dok cwinya oballe woko,

⁴ Pe imiyo nino mako waŋa: atye ki par mapol twatwal omiyo pe atwero loko

⁵ Abedo ka tamo pi kare macon, dok apo i kom lwak mwaka ducu ma okato.

⁶ Abedo ka tamo lam matut ki i cwinya i dyewor; alwodo lok dok apennye kekena ki i cwinya ni,

⁷ “Rwot mono bikwerowa woko matwal? Cwinye doki pe bibedo yom ikomwa?

⁸ En doŋ pe marowa ki mar mere ma pe lokke-ni? Cikkene ducu mono doŋ ogik woko pi kare ducu?

⁹ Lubaŋa mono doŋ wiye owil woko pi nyuto kicane i kom dano? En doŋ mono pe romo timo kica, pi kiniga ma omake?”

¹⁰ Dok awacci, “Gin ma cwero cwinya makato ducu en ene ni, twero pa en ŋat Mamalo Twal-li doŋ olokke woko.”

¹¹ Abipo, Rwot, abipo i kom ticci madit ma itiyo; ada, abipo i kom ticci ducu me aura ma yam itiyo i kare macon.

¹² Abibedo ka tamo pi gin ducu ma doŋ itimo, dok abilwodo lok i kom ticci madito ducu ma yam itiyo.

¹³ Kit gin ducu ma itiyo leŋ, ai Lubaŋa! Pe tye kit lubaŋa mo madit calo in!

¹⁴ In keken aye Lubaŋa ma tiyo taŋo me aura; dok inyuto tekki i kin lwak me rok ducu.

¹⁵ Yam ikoko lwakki ki i can pi tweroni, gin likwayo pa Yakobo ki Yucepu.

¹⁶ Ka pii me nam oneni, ci obedo ki lworo, ai Lubaŋa, ka oneni obedo ki lworo adada, dok nam matut ducu oyeŋŋe.

¹⁷ Kot oa ki i pol ocwer i lobo; piny omor ki i pol matek, ci lutkot owil i kabedo ducu.

¹⁸ Dwani omor owinnye wa i yamo lapiru mager; lutkotti bene omeny ocaro lobo woko ducu; lobo oyeŋŋe ki jo ma bedo iye ducu komgi omyel,

¹⁹ Iwoto ikato ki i dye nam, iŋolo ki i dye nam madoŋo matut; ento ojwe tyeni pe omedo ki nen.

²⁰ Itelo wi lwakki macalo lakwat romi, kun imiyo Moses ki Aron me gwokogi.