Jabuli 73 - Acoli Baibul

BUK ME ADEK Can ma bipoto i kom jo maraco

¹ Adada Lubaŋa ber bot dano ma cwmygi anr, en ber bot jo ma cwinygi leŋ,

² Ento an, tyena ogwaŋŋe onoŋo doŋ acok poto tyena onoŋo doŋ cok cer mada.

³ Nyeko onoŋo omaka woko i kom jo ma luwakke, dok aneno jo maraco gilony alonya.

⁴ Pe gitye ka winyo kit arem mo liweŋ; komgi yot dok pwot apwota,

⁵ Pe gibedo ka neno can kit ma jo mukene gineno kwede; pe gitye ka keto ayela i komgi macalo giketo i kom jo mukene.

⁶ Pi meno wakke odoko calo gin deyo me ŋutgi; tim bwami bene oboyogi woko calo gubone ki boŋo,

⁷ Waggi nen mupoŋ ki yub me tim maraco, ki cwinygi bene opoŋ ki tam me miŋo keken.

⁸ Giŋalo jo mukene kun giloko lok maraco; giburo dano dok giunogi bene.

⁹ Giloko lok marac i kom Lubaŋa ma tye i polo-ni, lok ma a i doggi romo i lobo woko ducu,

¹⁰ Pi meno omiyo lwak pa Lubaŋa gibedo ka pakogi; pe gineno bal mo i iwmgi kadi ki acel.

¹¹ Giwacci, “Lubaŋa kono twero ŋeyone niŋniŋ? En ŋat Mamalo Twal tye ki kit ŋec mo?”

¹² Nen, meno aye kit pa jo maraco; kare ducu gilimo lwak jami mapol, dok pud gimedde ameda ki noŋo lonyo makato.

¹³ Abedo ma cwinya leŋ mere noŋo, dok alwoko ciŋa ma pe abalo.

¹⁴ Gibedo ka keto ayela i koma dyeceŋ jwi, kun gipwoda nino ducu odiko odiko.

¹⁵ Kono nen aloko lok macalo meno, kono pe abedo ki ada bot yalwak pa litino pa Lubaŋa.

¹⁶ Ento atemo ki tekka ducu me niaŋ lok man, kadi bed oolo koma twatwal,

¹⁷ nio ka acito i ot maleŋ pa Lubaŋa; ka doŋ acako niaŋ gin ma bitimme i kom jo maraco.

¹⁸ Ada yam ik etogi i kabedo mapwot ma gicer acera ki iye; imiyo gipoto gitum woko ducu.

¹⁹ Ityekogi woko oyotoyot laboŋo galle, irwenyogi woko oyotoyot ki gin maraco ma kelo lworo.

²⁰ Jo-nu gibedo macalo lek ma ka ŋat mo oco ki i waŋ nino ci tamo pire; ka doŋ ico, ci calgi rwenyo woko i waŋi ki i tammi.

²¹ I kare ma abedo ki keccwiny, ma cwinya oton adada,

²² onoŋo amiŋ dok akwiya piny, alokke adoko macalo lee i komi.

²³ Ento kare ducu abedo kwedi; in ibedo ka mako ciŋa lacuc bene.

²⁴ Itela ki tam ma ibedo ka miya, i agikkibene ibijola ki deyo.

²⁵ Gin aŋo mukene ma dok atye kwede i polo, kono in keken? Pe tye gin mo i lobo kany ma amito twatwal makato in.

²⁶ Koma ki cwinya twero doko goro, ento Lubaŋa aye miya tekcwiny, dok en aye lonyona ma abigwoko matwal.

²⁷ Adada jo ma tye ka mabor kwedi gibito gitum woko; dok ibijwero jo ducu ma pe gigeno in.

²⁸ Ento ki tun bota, bedo cok ki Lubaŋa aye ber; in Rwot Lubaŋa aye doŋ idoko kalarrena, wek atit pi tic ducu ma in itiyo.