Jabuli 72 - Acoli Baibul

Loc pa kabaka ma kite atir

¹ Pwony kabaka wek Oŋol kop atir macalo in, ai Lubaŋa, dok inyut porreni bot latin ker,

² wek oŋol kop pa lwakki atir, dok olo lucan ki kit ma atir,

³ Wek godi ki cere-gu gukel kuc bot dano, ma en tye ka loyo lwak ki kit ma atir.

⁴ Myero kabaka owiny pido pa lucan dok oŋol kopgi kakare, olar bene jo ma piny obwoyogi; ento oŋiny jo ma uno dano mukenegu woko!

⁵ Lwakki myero guwori nakanaka i kare pa yalwakgi ducu pi kare ducu ma cen ki dwe pud tye!

⁶ Kabaka obed macalo kot ma cwer i kom lum ma doŋ gilwero, calo ŋido kot ma cwer bido ŋom.

⁷ Wek kit ma atir omedde ameda i kare me locce, dok kuc bene obed i lobone nakanaka nio wa i kare ma ‘dwe doŋ bibedo pe!

⁸ En biloyo lo bo cakke i dog nam tuŋŋi nio kwede wa i nam tuŋ cel, dokbiloyo cakke ki i kulu Euprate o kwede wa i agikkipiny.

⁹ Lumonene ducu gibiguno i nyime ka wore, lukworre gibibuto aryeba ic ci gibimoko apwa.

¹⁰ Luker me Tarcic ki pa jo ma bedo i cula nam, myero gucul mucoro bote, dok luker me Ceba ki me Seba gukel mot bote.

¹¹ Luker ducu myero guryebbe piny i nyime, dok rok ducu myero guti bote!

¹² En laro dano ma piny obwoyo ka okok bote, konyo Lucan ki jo ma pe gitye ki ŋat ma konyogi.

¹³ Kica make i kom jo magoro ki ma piny obwoyogi, ci laro kwo pa jo ma piny oloyo.

¹⁴ En kokogi ki i tim bwami ki i un ma gibedo ka unogi kwede; kwogi pire tek bote ma pe wacce.

¹⁵ Kabaka obed kwo nakanaka! Myero gimi jabu ma gikelo ki i Ceba bot kabaka; dok gibed ka lega pire kare ducu ma pe gikeŋ, gileg Lubaŋa wek oony gum i kome kareducu!

¹⁶ Cam bene myero ocek mabup i lobone, opoŋ wa wi godi-gu woko ducu; wek onyak nyig mabeco calo godi me Lebanon; wek gaŋi ducu opoŋ ki lwak dano madwoŋ ala, ma gipol calo lum ma i tim!

¹⁷ Wek nyiŋ kabakaori nakanaka, ki ywekane onya omedde ameda kit macalo cen ri kwede, Jo me rok ducu myero gulwoŋi ni lagumkom, dok myero guleg Lubaŋa ni omi gum i komgi ma rom ki gum ma omiyo i kom kabaka!

¹⁸ Gipwo Rwot, Lubaŋa pa Icrael, ma en keken aye ma tiyo gin me aura.

¹⁹ Gipak nyiŋe me deyo-ni nakanaka, wek deyone bene opoŋ lobo woko ducu! Amen ka dok Amen!

²⁰ Lega pa Daudi wod pa Yece gugik kany.