Jabuli 7 - Acoli Baibul

Lega pi loyo kop

¹ Ai Rwot Lubaŋana, ariŋo alaro boti; lara ki i ciŋ lukworra ducu ma giryemo kora, ci ikonya;

² ka pe, ci gibikila woko calo labwor ma kilo lee, gibiywaya woko ka ma ŋal o doŋ pe ma twero lara.

³ Ai Rwot Lubaŋana, ka ce onoŋo atiyo gin mo i kin jami magi, ka ce atimo bal i kom ŋat mo,

⁴ nyo ka atimo bal bot larema pi dwoko bote gin marac kom gin marac, nyo ka atimo bwami ayako jami pa lakworra woko laboŋo tyen lok mo,

⁵ ci mi lukworra guryem kora gumaka woko iyo, wek gureta piny i nom ci guneka woko, ka gibwota i ŋom kenyo ma doŋ ato woko.

⁶ Ai Rwot, a malo ki akemoni, ci ilweny i kom lukworra ma gubino magwa i koma-ni; ai Lubaŋana, co woko, pien in aye iciko pi nino me ŋolo kop.

⁷ Wek lwak me rok ducu gucokke gurumi woko dyere; ci ibed malo i kabedoni ka icak loyogi ki kunnu.

⁸ Rwot, in laŋolkop pa jo me rok ducu; ai Rwot, ŋol koppa muporo kit ma atir ma atye kwede, dok ma lubo kit ma cwinya leŋ kwede.

⁹ Gik tim marac ma jo maraco gitiyo woko, ento mok jo ma kitgi atir. In Lubaŋa ma kiti tye atir, in itemo tam pa dano kacel ki mitigi.

¹⁰ Lubaŋa aye kwot mera, en laro jo ma cwinygi atir,

¹¹ Lubaŋa laŋolkop ma ŋolo kop atir, en Lubaŋa ma tye ki kiniga nino ducu i kom lubalo.

¹² Ka ce dano mo pe oŋut, ci Lubaŋa bipako pala lucwanne. En doŋ otyeko ciko atumme dok otero;

¹³ en doŋ oyubo jami lewny maraco me nek, oroyo lak aterone-gu ducu i mac gucek woko makwar.

¹⁴ Nen, latim marac tamo tam marac ki i cwinye opoŋ ki yub me kelo ayela keken, kun loko lok gobagoba me bwolo dano.

¹⁵ En kwinyo bur matut i ŋom, ka dok lokke poto i bur ma en okwinyo-ni kekene.

¹⁶ Doŋ tamme marac-ci miyo en poto i can, ki tim bwamine dwogo gire i kome kene,

¹⁷ Abipwoyo Rwot pien kite atir mada, dok abiwero wer me pako nyiŋ Rwot, ma en ŋat Mamalo Twal.