Jabuli 68 - Acoli Baibul

Lubaŋa me Cinai ki me kabedo maleŋ

¹ Wek Lubaŋa oa malo, ci oket lukworre woko atata; wek jo ma kwere ducu gurin woko ki i nyime!

² Macalo yito duny cito woko, gin bene gibirwenyo woko kit meno; macalo odok kic leny woko ka giketo i ŋet mac, wek jo maraco bene guto woko i nyim Lubaŋa kit meno!

³ Ento wek jo ma kitgi atir gubed ki yomcwiny; wek gunyatte ki yomcwiny madwoŋ i nyim Lubaŋa; wek gudaŋŋe ma yomcwiny mito nekogi woko!

⁴ Wuwer bot Lubaŋa, wuwer wer wupak nyiŋe; wuil dwanwu malo ki wer bot en ma tye ka ŋwec ki gadigadine i wi pol; nyiŋe Rwot, wudwore, dok wubed ki yomcwiny i nyime.

⁵ En won jo ma wongi pe, dok en bene magwoko mon to; en Lubaŋa ma bedo i ot mere maleŋ.

⁶ Lubaŋa miyo paco bot jo mudoŋ kengi ma piny oloyo, wek gubed iye; en aye ma kwanyo lumabuc woko ki i ot kol mot maber miyo gibedo ki kuc; ento jo ma gin lujemo gibedo i lobo mutwo.

⁷ Ai Lubaŋa, i kare ma itelo wi lwakki, i kare ma iwoto kwedgi ki i dye tim,

⁸ ŋom oyeŋŋe, kot bene oa ki i polo ocorre i lobo, got Cinai bene oyeŋŋe i nyim Lubaŋa; oyeŋŋe i nyim Lubaŋa ma en Lubaŋa pa jo Icrael.

⁹ Imiyo kot madwoŋ ocwer i lobo, ai Lubaŋa; iroco loboni muol-li woko odoco.

¹⁰ Lwakki gubedo iye macalo pacogi; dok bene pi berri, ai Lubaŋa, ipito jo ma piny obwoyogi ki cam.

¹¹ Rwot omiyo cik, doŋ mon mapol gutiŋo lok maber miyo nya kun giwacci,

¹² “Luker kacel ki monygi gitye ka riŋo woko ariŋa!” Mon ma gudoŋ paco gupoko jami ma giyako woko i kingi.

¹³ Kadi gibuto i dwol romi, ginen calo akuri ma gidero bwome ki ryal, dok yece gidero ki jabu ma obedo alumalum.

¹⁴ Ka Lubaŋa Matwero-ducu oketo luker woko i wi got Jalmon, ci omiyo pee bene ocwer kunnu.

¹⁵ Got Bacan kara tek kuman, got ma lacol wiye pol, en got me Bacan!

¹⁶ In got ma lacol wii dwon-ni, piŋo iŋeno piny ki nyeko, wa i wi got ma Lubaŋa oyero me bedo iye-ni? Iyo, Rwot bibedo kunnu matwal!

¹⁷ Rwot oa ki i got Cinai bino i kabedone maleŋ ki lwak gadigadi matego ma romo alip ki alip.

¹⁸ Iito wa i wi got malo, kun icoko lwak opii cito kwedi, dok ibedo ka gamo mot ki bot dano, kadi wa ki bot jo ma yam gujemo woko. Rwot Lubaŋa doŋ bibedo kunnu.

¹⁹ Gipwo Rwot, pien nino ki nino en tinowa wa ki pekowa ducu i kore; Lubaŋa aye Lalarwa.

²⁰ Lubaŋawa en Lubaŋa me lar; en Rwot Lubaŋawa, ma larowa ki i to,

²¹ Ento Lubaŋa bigoyo wi lukworre turo woko, bigoyo wi dano ma yer wigi boco-gu ma gilubo timgi me bal.

²² Rwot owacci, “Abidwokogi cen ki i Bacan, abiwotogi ka maleŋ ki i te nam matut,

²³ wek wubin wulwok tyenwu ki remogi, wek gwogiwu bene gunaŋ remo pa lukwor madwoŋ macalo gimito.”

²⁴ Ai Lubaŋa, jo ducu gitye ka neno wotti, wot pa Lubaŋa ma Lakerra, ma cito kwede i kabedone maleŋ,

²⁵ Luwer gutelo nyim, lugo wer gudoŋ i ŋec, ka doŋ anyira ma gigoyo ajaa gubedo i dyere.

²⁶ “Gipwo Lubaŋa i cokke madit pa lwakke, wupak Rwot, wun likwayo pa Icrael ducu!”

²⁷ Mutelo yo bino ca-ni aye Benjamin, ma en kaka matidi, ka rwodi me Juda ki lwakgi madwoŋ gulubo, ka doŋ rwodi me Jabulon ki rwodi me Naputali i korgi.

²⁸ Nyut tweroni, ai Lubaŋa; nyut tekki, ai Lubaŋa, en tek ma itiyo kwede piwa-ni.

²⁹ Pi odi ma tye i Jerucalem, omiyo luker gikelo mot gityero boti

³⁰ Juk lee tim mager ma gibedo i kin lagada, gin lwak twoni ki litino dyaŋi pa lurok. Nyon jo ma yenyo lim ajog woko piny ki tyeni; ket lwak me rok ma cwinygi yom pi lweny-gu woko ata.

³¹ Wek gikel mola ki i Ejipt; dok wek jo Etiopia gubin oyotoyot ka ryeyo ciŋgi bot Lubaŋa.

³² Wuwer wer bot Lubaŋa, wun ker ducu ma i wi lobo; wuwer wer me pak bot Rwot;

³³ Wuwer wer bot en ma tye ka wot i wi polo, en wi polo macon; winy, en tye ka daŋŋe ki dwan matek adada.

³⁴ Wutit pi twero pa Lubaŋa, ma dit me locce tye i Icrael, ma twerone bene tye malo i polo.

³⁵ Lubaŋa me aura ma kelo lworo tye i kabedone maleŋ, en Lubaŋa pa Icrael, ma miyo twero ki tek bot jone. Gipwo Lubaŋal