Jabuli 66 - Acoli Baibul

Wer me pak ki pwoc pi tic me aura pa Lubaŋa

¹ Wun jo ducu ma wubedo i wi lobo, wugo kijira bot Lubaŋa ki yomcwiny;

² wuwer wer pi pako deyo me nyiŋe, wupake ki pak me deyo adada!

³ Wuwac bot Lubaŋa ni, “Gin me aura ducu ma itiyo ma kelo lworo ditte rom mene! Tweroni giri dit mada, miyo lumoneni ducu gimwolle amwola i nyimi.

⁴ Dano ducu ma i lobo giworo in; giwero wer me paki, kun giwero wer gipako nyiŋi.”

⁵ Wubin, wunen gin ma Lubaŋa otiyo; otiyo gin ma kela lworo mada i kin dano.

⁶ Oloko nam odoko ŋom mutwo; omiyo dano guwoto ki tyengi ki i dye kulu gukato loka tuŋcel, mumiyo wabedo ki yomcwiny pi gin ma en otiyo kunnu.

⁷ En loyo loc nakanaka ki tek me twerone, dok ciko waŋe me neno rok ducu. Jo ma gin lujemo myero pe gukette malo pigi kengi.

⁸ Wupwo Lubaŋa, wun lwak me rok ducu, wuwek dwan me pak ma wupake kwede owinnye.

⁹ En mugwokowa omiyo pud wakwo, dok pe oweko tyenwa ocer kadi ki acel.

¹⁰ In doŋ ityeko temowa, ai Lubaŋa; doŋ itemowa macalo ryal ma giliyo i mac.

¹¹ Ikelowa imiyo wamoko i obwo; dok bene icibo yec mapek me can I ŋewa ni watiŋ,

¹² Iweko lukworwa giŋweco ginyono wiwa woko piny; wawotoki i dye mac wa i dye pii, ento in doŋ ikelowa wao i kabedo malac me kuc.

¹³ Abibino i odi kun akelo boti gityer me gitum awaŋa; abicobo kwonna i nyimi kun amiyi gin ma yam acikke pire.

¹⁴ Abimiyo gin ma doŋ awaco ki doga ni abimini, gin ma acikke pire i kare ma onoŋo atye i can.

¹⁵ Abityero boti gitum awaŋa me lim makwo ma gucwe, dok abidunyo boti yito mac ma giwaŋo ki gitum me nyogi romi; abityero boti twoni dyaŋi kacel ki dyegi.

¹⁶ Wubin wuwiny, wun jo ducu ma wulworo Lubaŋa, ci abitito botwu gin ma Lubaŋa otiyo pira.

¹⁷ Cen akok bote matek, dok bene apake ki wer pi dworo nyiŋe.

¹⁸ Ka nene aumo balla i cwinya, kono Rwot pe owinyo kokona wacel.

¹⁹ Adada Lubaŋa doŋ owinyo kokona; doŋ owinyo legana ducu,

²⁰ Gipwo Lubaŋa, pien pe okwero winyo legana, dok bene pe okwanyo mar mere ma pe lokke woko ki i koma.