Jabuli 63 - Acoli Baibul

Yenyo Lubaŋa

¹ Ai Lubaŋa, in Lubaŋana, atye ka yenyi, kwona ducu ocuŋ piri; koma doŋ ool woko pi miti, calo abedo i lobo mutwo, muti, ma pii pe iye.

² Pi meno abedo ka yenyi i kabedoni maleŋ, pi neno tweroni kacel ki deyoni.

³ Mar meri ma pe lokke ber kato kwo, pi meno abipaki gira kare ducu.

⁴ Abipwoyi pi kare me kwona ducu; abikok boti kun ataŋo ciŋa,

⁵ Ayeŋ calo acamo moo ma ii cogo ki moo dwolo, abiwero wer kun apaki ki yomcwiny madwoŋ.

⁶ Kadi ka atye i wi kitandana wiya po i komi, dok abedo ka lwodo lok i komi dyewor benebene;

⁷ pien ibedo lakonya kare ducu, dok akanne i tipo te bwomi kun awero wer pi yomcwiny.

⁸ Amoko i komi woko Iikiŋ, ci ikwaka woko maber ki ciŋi malacuc.

⁹ Ento jo ma giyenya ma gimito neka gibidonyo gicito piny i te ŋom matut.

¹⁰ Gibinekogi woko i lweny ki pala lucwan, gibidoko cam pa too me tim.

¹¹ Ento kabaka bibedo mere ki yomcwiny pi Lubaŋa; jo ducu ma gikwoŋo kwoŋ ki nyiŋe gibipake; ento jo ma lugoba gibiumo doggi woko lipuk.