Jabuli 61 - Acoli Baibul

Gen ni Lubaŋa bigwoko dano

¹ Winy kokona, ai Lubaŋa, dok iwiny legana.

² Akok boti ki ka mabor, ki i agikki lobo, ka cwinya doŋ odem woko. Tela itera i kom got mabor ma kata;

³ pien in aye ka larrena, in cel matek ma igwoka i kom lukworra.

⁴ Wek abed i kemani nakanaka! Wek akanne i te bwomi abed ki kuc!

⁵ In doŋ ityeko winyo lokka, ai Lubaŋa, dok ityeko miya gipiny pa jo ma gilworo nyiŋi,

⁶ Med mwaka mapol i kom nino me kwo pa kabaka; wek obed nakanaka i kare pa yalwak ducu!

⁷ Mi en obed i wi komker nakanaka i nyimi, ai Lubaŋa; dok igwoke ki mar meri ma pe lokke, ki adani.

⁸ Pi meno abiwero wer kun apa ko nyiŋi, kun acobo bene kwonna ma akwoŋo i nyimi nino ki nino.