Jabuli 53 - Acoli Baibul

Miŋo ki tim maraco pa dano ma i lobo

¹ Dano ma lamiŋ waco ki i cwinye ni, “Lubaŋa gire pe,” Gin jo ma kitgi raco ma gitimo gin me kwer; pe tye ŋat mo ma tiyo gin maber.

² Lubaŋa neno dano ducu kun neno piny ki i polo, me neno ka ce tye jo mogo i kingi ma giryek, ma gimito Lubaŋa.

³ Gin ducu doŋ guŋak woko, gudoko jo ma kitgi raco; pe tye ŋat mo ma tiyo gin maber, pe, kadi ki acel,

⁴ Gin lutim maraco-ni, pe gitye ki ŋec? Giyako lim pa jona calo gicamo kwon, ma pe bene gilwoŋo nyiŋ Lubaŋa.

⁵ Gitye kunnu ki lworo madwoŋ kit lworo ma yam peya onen! Lubaŋa biketo cogo pa jo ma pe giŋeyo en woko ata; lewic bimakogi, pien Lubaŋa doŋ okwerogi woko.

⁶ Iyo, kono bedo ber ka larre pa jo Icrael bino ki i Cion! Ka Lubaŋa bidwoko gum bot jone. Yakobo bibedo ki yomcwiny madwoŋ, ki Icrael bene cwinye bibedo yom.