Jabuli 52 - Acoli Baibul

Nyatte marac ma tere pe

¹ In twon oteka, piŋo inyatte pi gin marac ma itimo i kom jo ma ŋeyo Lubaŋa?

² Ipiro lok me tyeko jo mukene woko dyeceŋ jwi. Lebi bit calo lyedi, imaro loko lok goba.

³ Imaro timo gin marac makato timo gin maber, dok imaro loko lok goba makato loko lok ada.

⁴ Imaro miyo arem i kom dano ki lok maraco ma iloko, in dano ma lagoba.

⁵ Ento Lubaŋa biŋinyi woko piny matwal; en bimaki ci ywayi woko ki i kemani; biputi woko ki i lobo pa jo makwo.

⁶ Jo ma kitgi atir bineno ci gibedo ki lworo, gibinyere kun giwacci,

⁷ “Nen, man aye dano ma onoŋo pe mito riŋo ka larre bot Lubaŋa, ento obedo ka geno lwak lonyone madwoŋ-ŋi, dok ogeno ni limme aye kalarrene!”

⁸ Ento an abedo macalo yat jeituni mujany ma tye i ot pa Lubaŋa, Abedo ma ageno mar pa Lubaŋa ma pe lokke nakanaka.

⁹ Abipwoyi nakanaka, pien doŋ ityeko tiyo man. Nyiŋi ber, abibedo ka tucone i nyim joni ma giŋeyi,