Jabuli 49 - Acoli Baibul

Geno lonyo bino pi miŋo

¹ Wuwiny lok man, wun lwak me rok ducu! Wuwiny, wun jo ducu ma wubedo i wi lobo,

² jo ma tye ki rwom ma malo ki jo me rwom ma piny, lulonyo kacel ki lucan.

³ Abibedo ka tamo tam wek aniaŋ maber ki i cwinya, dok abiloko lok me ryeko keken.

⁴ Abiciko ita me winyo carolok; abigonyo te lok me koc-lit ki wer ma agoyo agoya ki opuk.

⁵ Omyero abed ki lworo piŋo i kare me can, ma kun noŋo lumonena ma gitima marac guruma woko dyere,

⁶ gin jo ma geno lonyogi, ma ginyatte pi lwak lonyo madwoŋ ma gitye kwede?

⁷ Adada, pe tye dano mo ma twero kokke kekene, nyo ma twero miyo wel mo bot Lubaŋa me wilo kwone,

⁸ pien gin kok me kwo pa dano welle dit mada, dok pe twero romo

⁹ me miyo en medde ki bedo nakanaka, wek pe ocit i bur.

¹⁰ Iyo, en bineno ki waŋe ni kadi wa jo maryek bene gito, lamiŋ kacel ki ŋat ma wiye odiŋ bene gito kit meno, ci giweko lonyogi doŋ bot jo mukene.

¹¹ Lyelgi bedo pacogi matwal, bibedo kabedogi pi kare pa yalwak ducu, kadi bed gucak nyiŋ lobo ma gibedo iye ni megi kikomgi.

¹² Dano pe bedo ki deyone matwal; en obedo macalo lee tim ma gito gitum woko.

¹³ Man aye can ma poto i kom jo ma tye ki gen me miŋo; man agikki pa jo ma cwinygi yom pi dul jami ma gitye kwede.

¹⁴ Giyerogi giterogi i lyel macalo romi; to aye ma bibedo ka kwayogi. Gibicito atir gidonyo wa i lyel, ci komgi bitop woko; lyel bibedo pacogi.

¹⁵ Ento Lubaŋa bikoko tipona ki i twero pa lyel, pien en gire bigama,

¹⁶ Pe myero lworo omaki ka ce iŋeno ŋat mo doko lalonyo, kadi bed deyo me jami ma i ode tye ka medde ameda.

¹⁷ Pe bitiŋo gin mo cito kwede i kare ma en to; deyo ma en obedo kwede pe bicito lube i bur kunnu.

¹⁸ Kadi bed en tamo ni etye ki yomcwiny i kare ma pud ekwo, ci kadi bed dano gipake pi ticce ma konyo en keken,

¹⁹ en bicito ka bedo kacel ki yalwak pa kwarine i lyel ma pe doŋ gibimedo ki neno cen matwal.

²⁰ Dano pe bedo ki deyone matwal; en obedo macalo lee tim ma gito gitum woko.