Jabuli 48 - Acoli Baibul

Ber ki deyo pa Cion

¹ Rwot dit, pi meno myero gipake matek i gaŋ pa Lubaŋawa!

² Got mere maleŋ ber, dok wiye bor, ma yomo cwiny lwak me wi lobo ducu, en got Cion ma tye ka mabor tun acam, en aye gaŋ pa Kabaka madit.

³ Ki i gogone Lubaŋa onyutte ni en aye cel matek ma gwoko dano maber.

⁴ Nen, luker gucokke, gubino gugurre kacel.

⁵ I kare ma guneno, cutcut gubedo ki ur madit mada, lworo omakogi marac, ci guriŋo woko ata.

⁶ Komgi omyel matek ki kunnu, arem madwoŋ macalo pa dako ma rem ka nywal omakogi.

⁷ Ituro mel me Tarcic ki yamo ma oa tuŋ wokceŋ.

⁸ Kit ma watyeko winyone, doŋ bene waneno i gaŋ pa Rwot me mony, i gaŋ pa Lubaŋawa, ma Lubaŋa miyo cuŋ likiŋ nakanaka.

⁹ Wabedo ki tam i kom mar meri ma pe lokke, ai Lubaŋa, i dye odi.

¹⁰ Kit macalo nyiŋi oywek kwede-ni, ai Lubaŋa, omiyo pak ma gipaki kwede oromo wi lobo ducu. Ciŋi malacuc opoŋ ki twero meloc;

¹¹ wek got Cion obed ki yomcwiny! Wek gaŋi ma i Juda gubed ki yomcwiny pi kit ma iŋolo kwede kop!

¹² Wucit i Cion, wuwot wurum celle woko, wukwan wel lubelene,

¹³ ka dok wutam maber i kom celle, wucit wuwot wa i gogone bene; wek wutit bot yalwak ma bilubowu ni,

¹⁴ man aye Lubaŋa, en Lubaŋawa ma bedo nakanaka. En bibedo latelwa matwal.