Jabuli 46 - Acoli Baibul

Lubaŋa aye ka-larrewa dok tekwa bene

¹ Lubaŋa aye ka-larrewa dok tekwa bene, en oyubbe me konyowa i kare me can,

² Pi meno pe wabibedo ki lworo mo kadi bed lobo lokke, kadi bed godi gupot woko i dye nam

³ kadi bed pii me nam mor dok twagge, kadi bed godi giyeŋŋe pi twagge mere matek.

⁴ Tye kulu mo ma litino orane kelo yomcwiny i gaŋ pa Lubaŋa, i kabedo maleŋ pa ŋat Mamalo Twa!

⁵ Lubaŋa bedo i dye gaŋŋe, pi meno pe gibitwero balone wacel; Lubaŋa konye woko oyotoyot okogweno.

⁶ Rok ducu komgi oonyo koyo, ki ker-gu ducu oyeŋŋe woko; Lubaŋa daŋŋe ki dwan maloŋo, ci lobo leny woko.

⁷ Rwot me mony tye kwedwa; Lubaŋa pa Yakobo aye ka-larrewa.

⁸ Bin inen gin ma Rwot otiyo, kit macalo omiyo lobo odoŋ obur.

⁹ En juko lweny woko i wi lobo ducu; turo atum-gu dok ninyo wa ton woko, waŋo lwak kwot woko liweŋ ki mac.

¹⁰ “Wubed mot, dok wuŋe ni an Lubaŋa, At ye malo i wi rok ducu, dok gidwora i wi lobo ducu!”

¹¹ Rwot me mony tye kwedwa; Lubaŋa pa Yakobo aye ka-larrewa.