Jabuli 44 - Acoli Baibul

Lar i kare mukato ki ayelayela me kare-ni

¹ Ai Lubaŋa, doŋ watyeko winyone ki itwa, dok kwarowa bene gutito botwa, tic ducu ma yam itiyo i karegi, i kare macon muka to:

² iryemo lurok woko ki twero ii kikomi, imiyo joni gubedo i lobogi macalo yadi ma ipito; iuno lwak me rok mapol ento imiyo kwarowa gubedo ki kuc.

³ Lwakki pe guloyo lobo meno ki pala lucwangi, pe gulimo Loc pi twerogi; ento meno obedo pi tweroni ki pi tekki, dok pi ceŋŋi ma oryeny i komgi; pien onoŋo in cwinyi yom i komgi.

⁴ In keken aye Kabakana ki Lubaŋana, ma yam iciko pi loc bot Yakobo.

⁵ Pi konnyi miyo wabiryemo lukworwa gidok piny, dok wabinyono jo ma gibino ka monyowa pi nyiŋi.

⁶ Pe ageno atumma, dok pala lucwanna bene pe twero Lara.

⁷ Ento in aye ma ilarowa ki i cin lukworwa, ci imiyo lewic omako jo ma gidagwa.

⁸ Wabedo ka nyatte i Lubaŋa teretere, dok wabimedde ka pwoyo nyiŋi matwal.

⁹ Ento in doŋ ityeko bolowa woko dok imiyo wadoko mayot, pe inywako yo me ci to ka lweny kacel ki monywa.

¹⁰ Imiyo walokke ki bot lumerokwa wadwogo woko cen; ci imiyo lukworwa guyako jami mapol ata.’

¹¹ Imiyo wadoko calo romi meaneka, dok ikeyowa woko i kin lurok.

¹² Icato lwakki i wel manok mo, pe imito ni gicul wel madwoŋ pigi.

¹³ Imiyo luwotwa ma gibedo cok kwedwa giloko lok aŋec i komwa, imiyo jo ma gibedo i kabedo murumowa gicayowa dok giŋalowa.

¹⁴ Imiyo wadoko lok aboka i kin lurok, wadoko ginanyera i kin rok ducu.

¹⁵ Abedo ki cwercwiny dyeceŋ jwi, ma noŋo waŋa olwal woko ki lewic,

¹⁶ pi winyo lok cac pa jo ma giloko lok aŋec i komwa, ki lok pa jo ma ginywarowa, dok pi neno lukworwa ma gin lucul kwor ma gubino ka lewny i komwa,

¹⁷ Man ducu doŋ otimme i komwa, kadi bed wiwa pe owil i komi, dok bene kadi pe watero gicikkeni.

¹⁸ Cwinywa pe oa ki i komi wacel, dok bene pe waŋak wabwoto lubo cikki.

¹⁹ Itenyowa woko liyak i kabedo pa too, iumowa woko lipuk ki colpiny mapek.

²⁰ Ka ce nene wiwa owil woko i kom nyiŋ Lubaŋawa,’ nyo ka onoŋo wacako woro lubaŋa mukene ma yam pe waŋeyo,

²¹ kono Lubaŋa mono pe oroto man oŋeyo woko? En ŋeyo muŋ ducu ma tye i cwiny dano.

²² En to gibedo ka nekowa dyeceŋ jwi piri, gikwanowa macalo romi me aneka.

²³ Co woko, ai Rwot! Piŋo inino anina? Co woko! Pe ibolwa woko matwal!

²⁴ Piŋo ikanne woko ki botwa? Piŋo wii wil woko i kom can ma watyekwede kun iŋeno anena ka giunowa?

²⁵ Wapoto woko ducu piny i ŋom; waryebbe piny i apwa pien tipowa doŋ ool.

²⁶ A malo, bin ilarwa! Larwa pi mar meri ma pe lokke!