Jabuli 43 - Acoli Baibul

Lega pi loyo kop pi lar

¹ Ai Lubaŋa, pid pira dok imi alo kop i kom lwak me rok ma pe giŋeyi; lara ki i cin jo maraco ma lubwola.

² In aye Lubaŋa ma ariŋo alaro boti; piŋo ibola woko cen ka mabor? Piŋo awoto ma akumo akuma kun lakworra una twatwal?

³ Doŋ icwal ceŋŋi ki adani; wek gutela, wek gukela i kom got meri maleŋ, wa i odi ka ma ibedo iye!

⁴ Ci abicito wa i kom keno tyer pa Lubaŋa, bot Lubaŋa ma yomo cwinya mada; ka doŋ abipaki ki opul agoya, ai Lubaŋa, Lubaŋana.

⁵ Piŋo cwinya poto, dok abedo ki cwercwiny? Piŋo awinyo lwak par madwoŋ i cwinya? Pud abigeno Lubaŋa aye, dok abipake bene, Latar mera ki Lubaŋana.