Jabuli 42 - Acoli Baibul

BUK ME ARYO Miti me bedo cok ki Lubaŋa

¹ Kit macalo til yenyo kwede kulu ma piine tye ka mol, an bene atye ka yenyo ki i cwinya kit meno, ayenyo in, ai Lubaŋa,

² Cwinya mito anen Lubaŋa, en Lubaŋa makwo-ni Abicito ka neno waŋ Lubaŋa awene wek awore?

³ Pig waŋa doŋ odoko camma i dyeceŋ naka wa i dyewor ducu, ma noŋo dano gipenya teretere ni, “Lubaŋani tye kwene?”

⁴ Cwinya dem woko, ka apo i kom lok magi: kit macalo acito kacel ki lwak kun atelo wigi, ma wawoto i rek ma gurye aryeya me cito i ot pa Lubaŋa, kun lwak gidaŋŋe ki yomcwiny ma giwero wer me pwoc, i kare me kwero nino madito,

⁵ Piŋo cwinya poto, dok abedo ki cwercwiny? Dok piŋo awinyo lwak par madwoŋ i cwinya? Pud abigeno Lubaŋa aye, dok abipake bene, Lalar mera ki Lubaŋana,

⁶ Cwinya poto, miyo apo piri ki i lobo me Jordan ki Kermon, ki i got Mijar.

⁷ Nam madoŋo matut lwoŋo nam wadigi ki i mor pii ki i waŋ acurcurri; biamwonyini ducu me pii ma twagge doŋ otyeko mwonya woko licwic.

⁸ Rwot miyo mar mere ma pe lokke ryeny i koma i dyeceŋ; ci i dyewor awero wer me pake, kun alego Lubaŋa ma miyona kwo.

⁹ Abiwaco bot Lubaŋa ni, “In gotta; piŋo wii owil woko i koma? Piŋo awoto ma akumo akuma kun lakworra bene una twatwal?”

¹⁰ Nen calo atye ki bur marac twatwal mudet i koma pien lukworra gibedo ka yeta, kun gipenya teretere ni, “Lubaŋani-ni tye kwene?”

¹¹ Piŋo cwinya poto, dok abedo ki cwercwiny? Piŋo awinyo lwak par madwoŋ i cwinya? Pud abigeno Lubaŋa aye, dok abipake bene. Lalar mera ki Lubaŋana.