Jabuli 40 - Acoli Baibul

Wer me pak pi lar

¹ Akuro Rwot kun adiyo cwinya; ci en okulle piny owinyo kokona.

² En owota woko ki i bur marac, ki i coto manwaŋ, ci oketa acuŋ i wi got, omiyo abedo ka wot atir.

³ Opwonya ki wer manyen, en wer me pak bot Lubaŋawa. Jo mapol gibineno ci lworo makogi woko, ci gibigeno Rwot.

⁴ Tye ki gum dano ma geno Rwot, ma pe lokke ribbe ki jo ma luwakke, dok ma pe ribbe ki jo ma ŋak woko kun giworo cal lubaŋa-gu!

⁵ Ai Rwot Lubaŋana, itiyo tic madito me aura mapol, dok iyubo lwak tam mapol pi konyowa; pe tye ŋat mo macalo in! Ka onoŋo ne ne atuc dok atit pigi, onoŋo gibedo pol makato ma pe gitwero kwano welgi.

⁶ Pe imito gitum kadi gityer; ento ityeko yabo ita wek awiny. In pe ipenyo pi gitum awaŋa nyo pi gitum me bal,

⁷ Ka doŋ agamo ni, “Nen, an a en; gicoyo lok ma mako koma i buk adolani.

⁸ Cwinya bedo yom me tiyo gin ducu ma imito, ai Lubaŋa; amako cikki dok agwoko tye cwinya.

⁹ Doŋ atyeko tito lok maber me yomcwiny me larri i dye lwak i cokke madit; nen, pe am iyo doga woko aliŋ aliŋa, kit macalo in bene ineyo-ni, ai Rwot.

¹⁰ Pe akano lok me larri pira kena, e nto aloko pi ada ki pi larri; dok pe amuŋo mar meri ma pe lokke kacel ki adani bot lwak ma i cokke madit.

¹¹ Ai Rwot, pe itwonna kicani, wek mar meri ma pe lokke, ki adani, gugwoka nakanaka.

¹² Gin marac ma welgi pe kwanne guruma woko dyere; balla doŋ obwoyo koma woko, miyo pe doŋ aneno piny; gipol gikato yer wi ya woko; tekcwiny doŋ orwenyo woko ki bota.

Lega pi kony

¹³ Ai Rwot, mi cwinyi obed yom me lara! Ai Rwot, bin oyotoyot ikonya!

¹⁴ Wek lewic omak jo ma gimito neka, dok gubed ki anyobanyoba bene; wek gidwokgi cen, wek alee otwodgi, gin jo ma mito tima marac-ci!

¹⁵ Wek gubed ma piny orem kwedgi woko pi lewic ma doŋ omakogini, gin jo ma giwacca ni, “Aa, Aa!”

¹⁶ Ento mi jo ducu ma giyenyo in gubed ki yomcwiny madwoŋ komi; dok imi jo ma gimaro larri gumedde ki waco nakanaka ni, “Rwot dit!”

¹⁷ An gira lacan, dok piny obwoya woko; ento Rwot tamo pira. In aye lakony ki lalarra; ai Lubaŋana, pe igalle!