Jabuli 39 - Acoli Baibul

Tuco bal pa dano ma tye ki arem

¹ Awaco ni, “Abigwokke i kit gin ducu ma anyo, wek pe atim bal ki lok ma aloko; abiliŋ ma pe aŋamo doga ka waco lok mo, ka ce atye kacel ki jo maraco.”

² Aliŋ aliŋa ma pe awaco lok mo, dok bene ajukke kekena kadi me waco gin mo maber; ento cwercwinnya dok omedde ameda marac,

³ cwinya olyetti woko dok owaŋ matek. I kare ma pud alwodo lok, ci mac olyel; ci acako lok maber laboŋo lworo.

⁴ “Rwot, mi aŋe agikkina, dok imiya aŋe wel ninona; wek aŋe bene kit macalo kwona rwenyo kwede oyot.

⁵ Nen, Iŋolo ninona obedo manok, dok kare me kwona pe gin mo ki boti. Adada dano acel acel cuŋ mere macalo yweyo nono!

⁶ Adada dano woto wirre calo tipo! Adada gicanne nono pi gin ma pe konyo; dano kano lonyo madwoŋ, kun pe ŋeyo aŋa ma bileyo,

⁷ “Doŋ kombeddi mono, Rwot, akuro gin aŋo? Genna tye i komi.

⁸ Lara ki i balla ducu. Pe imi adok gin aŋala pa lumiŋ.

⁹ Aliŋ woko litik, pe aromo ŋamo doga ka lok; pien in aye ma imiya peko ma kit man.

¹⁰ Pe dok imedde ka pwoda ki odooni; adoŋ me ciŋi ma idoŋa kwede doŋ mito neka woko.

¹¹ Ka ipwodo dano kun ijuke pi bal, ityeko berre woko macalo nyenye ma camo gin mo ma pire tek bot dano meno; adada dano obedo mere rom ki yweyo mamwa.

¹² “Ai Rwot, winy legana, icik iti iwiny kokona; pe iliŋ woko aliŋa ka akok boti! An a weloni pi kare manok, dok an labedo macalo kwarowa ducu.

¹³ Pe inena, nen ka mukene, wek koŋ abed ki yomcwiny mo, ma pud peya aa aweko lobo man woko matwal.”