Jabuli 38 - Acoli Baibul

Lega pa dano ma labalo ma tye ki arem

¹ Ai Rwot, pe ijuka ki kiniga, dok pe ipwoda ki akemo!

² Ateroni doŋ gucela, gumwony woko iiya, kun in bene icwalo ciŋi piny idiya kwede woko.

³ Pi kinigani omiyo atwo matek, pe atye ki yotkom i cogona ducu; man obino pi balla.

⁴ Balla doŋ oketo koma woko; gipek calo yec ma pe aromo tiŋone,

⁵ Waŋ burra kwok maŋwe pi minona,

⁶ atyeko kulle woko piny adada ma abuto i ŋom aryeba cwiny; dyeceŋ jwi awoto kun akumo akuma.

⁷ Pyera bene waŋŋe awaŋa calo mac, koma pe tye ki kit yotkom mo wacel.

⁸ Koma oloc dok onyonne woko adada; acur pien atye ki remcwiny madwoŋ twatwal.

⁹ Ai Rwot, iŋeyo gin ma amito ducu, gin ma abedo ka cur pire-ni pe obedo me muŋ ki boti.

¹⁰ Adunona tye ka gone matek lituktuk, miyo tekone bene tum woko waŋa bene ocor woko, pe neno piny doŋ maber.

¹¹ Lurema ki luwota ma wabedo kwedgi gicuŋ cen ka mabor pi bur ma oonyo: i koma, ki lutuwa bene gicuŋ cen ka mabor adada.

¹² Jo ma giyenyo yo meneka guciko owicgi pira, jo ma gimito keto ret i koma giloko lok me tyeko kwona woko, gibedo ka piro lok marac i koma dyeceŋ jwi.

¹³ Ento an abedo macalo ladinit, pe awinyo lokgi, dok abedo calo ladoge-oto ma pe ŋamo doge ka lok.

¹⁴ Iyo, adoko calo dano ma pe winyo, ma pe loko kit lok mo me juk.

¹⁵ Ento genna ducu tye i komi, ai Rwot; ai Rwot Lubaŋana, in aye ma ibigamo doga.

¹⁶ Alegi alega keken ni, “Pe iwek jo ma ginyatte i koma ka tyena ocer, gunoŋ yomcwiny i koma!”

¹⁷ Doŋ acok poto, atye ka winyo arem i koma kare ducu.

¹⁸ Atuco balla, kun cwinya cwer mada pire.

¹⁹ Lukworra ma gidaga noŋo laboŋo gin mo ma abalo botgi gitek, jo ma gidaga laboŋo te lok mo gipol.

²⁰ Jo ma giculo gin maber pi gin marac gudoko lukworra, pien amito ni ati gin maber.

²¹ Ai Rwot, pe ibwota: ai Lubaŋana, pe ibed bor kweda!

²² Bin oyot ikonya, ai Rwot, lalarra!