Jabuli 37 - Acoli Baibul

Agikki pa jo maraco ki pa jo ma kitgi atir

¹ Pe myero ibed ka paro pi jo maraco; pe ibed ki mone i kom jo ma gitiyo gin marac;

² pien gibitwo woko calo lum, dok gibiner woko calo pot dek madyak.

³ Gen Rwot, dok iti gin maber; bed i lobo ki kuc.

⁴ Bed ki yomcwiny i Rwot, ci en bimiyi gin ducu ma cwinyi mito.

⁵ Mi kwoni bot Rwot; gen en, ci en bikonyi.

⁶ En bikwanyo kop woko ki i wii miyo berri ryeny calo ceŋ, doŋ loyo koppi bibedo calo ceŋ ma ryeny i cwiny dyeceŋ,

⁷ Bed mot i nyim Rwot, dok idi cwinyi ikure. Pe ipar pi ŋat ma tye ka lony oyotoyot, kadi pi ŋat ma cobo yubbe me timo gin maraco.

⁸ Pe iwek kiniga omaki, dok ibwot akemo obedi; pe ibed ki par iye, pien tim ma kit meno kelo gin marac keken.

⁹ Lutim maraco gibityekogi woko; ento jo ma gigeno Rwot gibicamo lobo.

¹⁰ Odoŋ kare manok, ci dano marac doŋ bibedo pe matwal; kadi iŋi i kabedone maber, ibinoŋo ni en doŋ pe kunnu.

¹¹ Ento jo mamwol aye gibicamo lobo; gibibedo ki yomcwiny pi lonyo madwoŋ ma gibilimo.

¹² Dano marac piro lok i kom dano ma kite atir, dok kayo lake i kome matek.

¹³ Ento Rwot nyero dano marac anyera, pien neno ni nino me ŋolo kop i kom dano marac doŋ tye ka bino.

¹⁴ Jo maraco giwoto pala lucwangi dok gitelo atumgi, me neko lucan kacel ki jo ma piny obwoyogi, ki pi neko jo ma cwinygi atir.

¹⁵ Pala lucwangi bicobo komgi kekengi, ki atumgi bene gibituro woko.

¹⁶ Gin mo manok ma dano ma kite atir tye kwede ber kato lonyo madwoŋ ma jo maraco mapol gitye kwede.

¹⁷ Twero ma jo maraco gitye kwede gibituro woko; ento Rwot bigwokojo ma kitgi atir.

¹⁸ Rwot gwoko jo ma lubo cikke; dok gipinygi biri nakanaka.

¹⁹ Lewic pe bimakogi i kare me can, dok gibibedo ki cam madwoŋ i kare me kec.

²⁰ Ento jo maraco, ma gin lukwor pa Rwot, gibito gitum woko macalo lum i olet dyaŋ, gibiduny woko calo yito ma duny.

²¹ Dano marac mako banya, ento pe twero culo waŋe, ento dano ma kite atir lakica, miyo mere jami amiya noŋo.

²² Jo ma Rwot omiyo gum botgi aye gibicamo lobo, ento jo ma doŋ en ocenogi gibityekogi woko.

²³ Ka Rwot telo dano i kit kwo ma myero en obed kwede, ci en moko dano ma kwone yomo cwinye,

²⁴ Kadi oyokke, ci pe bipoto piny aryeba ic, pien Rwot tye jole woko ki ciŋe.

²⁵ Yam abedo latin, ento man doŋ adit; pud peya aneno gibwoto dano ma kite atir, kadi ki litinone bene pe aneno ka gilego kwon alega.

²⁶ En nino ducu ber, miyo jami amiya, dok dano gimako banya bote, ki litinone bene gidoko joma kelo gum bot dano,

²⁷ A woko ki i gin marac, iti gin maber, ci ibibedo iri nakanaka.

²⁸ Rwot maro ŋolo kop atir; pe bibwoto jo ma gigeno eno En bigwoko jo ma kitgi atir matwal, ento gibityeko litino pa jo maraco woko ducu.

²⁹ Jo ma kitgi atir gibicamo lobo, dok gibibedo iye matwa!’

³⁰ Dano ma kite atir loko lok me ryeko, dok loko gin ma tye atir.

³¹ En gwoko cik pa Lubaŋane i cwinye; pe ŋak woko ento bedo ki kit maber kare ducu.

³² Dano marac neno ŋat ma kite atir, ci yenyo yo me neke woko.

³³ Ento Rwot pe bibwoto en ata i ciŋ lakworre, nyo ni giŋol kop oloye ka gikelo en ka pido.

³⁴ Kur Rwot, dok ilub cikke, en bimiyi twero me camo lobo; ibineno bene ka gityeko jo marac woko.

³⁵ Aneno dano marac tye ka keto gero mukatŋ kare, kun tye ka doŋo medde ameda calo yat cedar me Lebanon.

³⁶ Lacen ka akato ki kenyo, anoŋo ni en doŋ pe matwal; kadi bed ayenye, ento pe doŋ twero noŋŋe,

³⁷ Nen dano ma pe ki bal mo, dok inen dano ma cwinye atir; dano ma kelo kuc Likwaye bedo tye.

³⁸ Ento jo ma lubalo gibityekogi woko liweŋ; ki likwayo pa jo maraco bene gibijwerogi woko.

³⁹ Rwot aye ma laro jo ma kitgi atir; en bene ma gwokogi i kare me can.

⁴⁰ Rwot konyogi, dok larogi ki bot jo maraco, pien giriŋo gilaro bote.