Jabuli 34 - Acoli Baibul

Wer pak pa dano ma Lubaŋa olare ki i can

¹ Abipwoyo Rwot kare ducu; dok abibedo ka pake nakanaka.

² Abipako en pi gin ma doŋ otyeko tiyo; wek jo ma gitye ki can guwiny dok gubed ki yomcwiny.

³ Wuribbe kweda me pako dit pa Rwot, wek wapaku nyiŋe kacel!

⁴ Ayenyo Rwot, ci en ogamo legana dok olara ki i kit lworo ducu ma onoŋo atye kwede.

⁵ Wuŋen bote, wek wanwu oryeny ma noŋo cwinywu yom, wek lewic pe omakwu.

⁶ An lacan akok bot Rwot, ci en ogamo doga, dok olara ki i canna ducu,

⁷ Lamalaika pa Rwot cuŋ kun gwoko jo ma gilworo Rwot, dok larogi bene woko ki i can.

⁸ Tem koŋ inen ni Rwot oor. Dano mariŋo laro bote bedo ki yomcwiny!

⁹ Wulwor Rwot, wun jo maleŋ mere ducu, gin mo pe ma rem bot jo ma gilwore.

¹⁰ Litino labwor kare mogo camgi pe, dok kec nekogi; ento jo ma giyenyo Rwot gin mabeco mo pe birem botgi.

¹¹ Wubin litinona, wuwiny lokka, abipwonyowu kit me woro Rwot.

¹² Aŋa ma maro kwo, ma paro ni eri pi kare malac wek enoŋ yomcwiny i kom jami mabeco?

¹³ Gwok lebi pe ilok gin marac, dok dogi bene pe olok lok me bwola.

¹⁴ A woko ki i gin marac, ci iti gin maber; yeny kuc, dok iti matek macalo itwero wek inoŋ.

¹⁵ Rwot neno jo ma kitgi atir, dok ciko ite winyo koko ma gikok bote pi kony.

¹⁶ Rwot dag neno jo ma lutim maraco; en miyo wi dano wil woko i komgi matwal i lobo-ni.

¹⁷ Ka jo ma kitgi atir okok bote pi kony, en winyo kokogi, dok larogi bene woko ki i cangi ducu.

¹⁸ Rwot tye cok ki jo ma cwinygi goro, eci laro jo ma gitye ki arem madwoŋ i cwinygi.

¹⁹ Dano ma kite atir limo can madwoŋ; ento Rwot lare ki i canne ducu.

²⁰ En gwoko cogo ma i kome ma ber wek kadi acel mo pe otur woko.

²¹ Gin marac bineko jo maraco; dok jo ma gidag jo ma kitgi atir gibipwodogi.

²² Rwot koko kwo pa luticce; en pe miyo pwod bot ŋat mo i kom jo ma giriŋo gilaro bote.