Jabuli 33 - Acoli Baibul

Wer me pako Lubaŋa

¹ Wuwer matek ki yomcwiny i Rwot, wun jo ma kitwu atir! Myero wupake, wun jo ducu ma cwinywu leŋ.

² Wumi pwoc bot Rwot kun wupake ki opuk, wupake ki wer naŋa ma tolle tye apar.

³ Wuwer wer manyen bote, wugo naŋa ki kit kwiriwu ducu kun wuwero ki dwanwu maloŋo.

⁴ Lok pa Rwot tye ada, dok ticce ma en tiyo ducu tiyo ki gen,

⁵ Rwot maro kit ma atir ki ŋolo kop atir; lobo opoŋ ki mar mere ma pe lokke.

⁶ Rwot oketo polo pi lokke, ka oketo cen, dwe ki lakalatwe ki lok ma en oloko ki doge.

⁷ Ocoko pii me nam woko ducu oguro kacel i kabedo acel calo opiko i opoko; ka okano nam madoŋo bene i kicika odine me kano jami.

⁸ Wek lobo ducu omi woro bot Rwot, wek jo ducu ma Jibedo i lobo gulwore.

⁹ I kare ma en olok, ci lobo okette; gin ma en ociko otiŋe, dok ocuŋ matek likiŋ.

¹⁰ Rwot geŋo yub pa lurok pe cobbe, dok geŋo lwak me rok mapol me keto yubgi i tic,

¹¹ Yub pa Rwot bedo matwal; yub ducu ma en tamo ki i cwinye bedo matwal i kare pa yalwak ducu.

¹² Lwak me rok ma Rwot aye Lubaŋagi tye ki gum, gin aye jo ma en oyero me bedo jone kikome!

¹³ Rwot neno piny ki i polo; en neno dano ducu.

¹⁴ En lworo waŋe ki i wi komker ka ma obedo iye, neno jo ducu ma gibedo i lobo.

¹⁵ En aye ma oketo cwinygi ducu, dok en neno gin ducu ma gitiyo.

¹⁶ Kabaka pe twero loyo lweny pi dul mony matek ma en tye kwede; lalweny pe twero loyo Lweny pi tekkom madit ma en tye kwede.

¹⁷ Pe gitwero geno aguragura ‘me lweny ni romo miyo loc; tekke-ni ducu pe twero laro dano.

¹⁸ Nen, Rwot nenojo ma giwore, gin jo ma gigeno mar mere ma pe lokke,

¹⁹ wek olargi ki i to, dok ogwokgi gubed makwo i kare me kec.

²⁰ Genwa ducu tye i kom Rwot en lakonywa, dok en kwot ma gwokowa.

²¹ Iro, wabedo ki yomcwiny pi en, pien wageno nyiŋe maleŋ.

²² Ai Rwot, wek mar meri ma pe lokke obed i komwa, kit macalo wageno in-ni.