Jabuli 32 - Acoli Baibul

Tuco bal weko bal, ki yomcwiny ma a iye

¹ Dano ma doŋ giweko balle tye kigum, ma balle doŋ gikwanyo woko,

² Dano ma Rwot pe doŋ kwano bal mo i wiye tye ki yomcwiny, ma pe tye ki bwola i cwinye.

³ I kare ma akwero tuco balla, anoŋo ni koma oballe woko pi cur ma abedo ka cur dyeceŋ jwi.

⁴ Imiya pwod malit i dyeceŋ ki i dyewor; tekona ducu otwo woko macalo toyo two woko ki Lyeto me oro.

⁵ Cut atuco balla boti, pe amuŋo gin marac ducu ma onoŋo atimo; awaco ni, “Abituco balla ducu bot Rwot”; ci in bene iweko balla ducu.

⁶ Pi meno wek jo ducu ma gigeni gukel legagi boti; i kare me can ma noŋo lalele me pii madwoŋ mito mwonyogi woko, pii meno pe bio i komgi.

⁷ In aye kakannena, igwoka ki i ayela; igura woko dyere ki larri.

⁸ Abipwonyi dok abicimmi yo ma myero ilubi; abimiyi ryeko dok abineni.

⁹ Pe ibed calo aguragura nyo kana ma pe niaŋ, ma myero gitwe doge ki wiye, wek olub gin ma iwaco.

¹⁰ Jo maraco gibilimo arem madwoŋ; ento jo ma gigeno Rwot en gwokogi ki mar mere ma pe lokke.

¹¹ Wubed ki yomcwiny madwoŋ i Rwot, wun jo ma kitwu atir, wudaŋŋe pi yomcwiny, wun jo ducu ma cwinywu atir!