Jabuli 30 - Acoli Baibul

Lega me pwoc pi lar ki i to

¹ Amito paki, ai Rwot, pien doŋ ilara, dok pe imiyo lukworra gubedo ki yomcwiny pira.

² Ai Rwot Lubaŋana, onoŋo akok boti ni ikonya, ci in doŋ ityeko caŋa woko.

³ Ai Rwot, in aye ma ilara ikwanya woko ki i lobo pa jo muto, iroco kwona odoko nyen ki i kin jo ma gudonyo piny i bur.

⁴ Wuwer wer me pako Rwot wun jone ma gene, dok wumiye pwoc pi nyiŋe maleŋ.

⁵ Kinigane pe ri, bedo pi kare manok keken, ento berre bedo pi kare me kwowa kulu. Gwok koko twero bedo i dyewor, ento yomcwiny bino i odiko.

⁶ Doŋ an i kare ma atye ki lonyo awacci, “Pe gibidira cen.”

⁷ Pi berri bota, ai Rwot, omiyo iciba acuŋ likiŋ macalo got matek. Ento i kare ma ikanne woko ki bota, abedo ki lworo madwoŋ,

⁸ Akok boti, ai Rwot, dok alego lega me bako dog bot Rwot kun awaco ni,

⁹ “Kit kony aŋo ma tona twero miyo boti ka adonyo piny i bur? Apwa me ŋom mono bipaki? Dok binyuto berri ki adani?

¹⁰ Ai Rwot, winy kokona, wek kica omaki i koma! Ai Rwot, bed lakonya!”

¹¹ Ityeko loko kumo ma atye kwede odoko myel me yomcwiny madwoŋ: igonyo bene boŋo colana woko ka doŋ iruka ki yomcwiny.

¹² Pi meno pe abibedo liŋ; abiwero wer me pak boti. Ai Rwot Lubaŋana, abimiyi pwoc nakanaka.