Jabuli 29 - Acoli Baibul

Dwan Rwot winnye i dye yamo mapek

¹ Wupak Rwot, wun gin makwo ducu ma wubedo i polo, wupak Rwot pi deyone ki pi tekke,

² Wupak nyiŋ Rwot ma tye ki deyo; wuwor Rwot kun wuruko ginaruka maleŋ.

³ Dwan Rwot mor winnye wa i wi pi i: dwan Lubaŋa me deyo tye ka mor, Rwot dwane tye ka winnye i wi nam madoŋo,

⁴ Dwan Rwot winnye ma opoŋ ki tek dok ki dit me loc.

⁵ Dwan Rwot baro wa yadi cedar woko, kadi wa yadi cedar madoŋo me Lebanon.

⁶ En miyo godi me Lebanon pye calo laroya dyaŋ, ki Cirion bene en miyo pye calo wod jubi ma i tim.

⁷ Dwan Rwot meny ci miyo leb mac puk woko lipil.

⁸ Dwan Rwot miyo tim yeŋŋe, Rwot yeŋo tim Kadec,

⁹ Dwan Rwot miyo til nywal, dok jwero yadi me buŋa wo ko ducu; dano ducu ma gicokke i ode gidane ni, “Deyo obed bot Lubaŋa!”

¹⁰ Rwot aye ma loyo pii matut ducu ma tye i nam; en bedo i wi komkerre matwal macalo kabaka,

¹¹ Rwot myero omi teko bot lwakke! En myero omi gum me kuc i kom jone!