Jabuli 25 - Acoli Baibul

Lega pi tel ki pi gwok

¹ Atiŋo kwona amiyo boti, ai Rwot.

² Ageno in, ai Lubaŋana, pe iwek lewic omaka; pe iwek lukworra guŋala,

³ Iyo, pe iwek lewic omak jo ma gikuri; ento wek lewic omak jo ma gijemo woko i komi nonono.

⁴ Pwonya wek aŋe yoni ducu, ai Rwot; mi anegi maber.

⁵ Tela i ada meri, dok ipwonya, pien in Lubaŋa Lalarra, Abedo ka kuri dyeceŋ jwi.

⁶ Po pi kicani, ai Rwot, ki pi mar meri ma pe lokke, ma yam inyuto nia wa con,

⁷ Pe ipo pi roc ki bal ma yam atimo i kare me tinona. Ento po pira pi mar meri ma pe lokke, ki pi berri, ai Rwot.

⁸ Rwot ber, dok cwinye atir; pi meno en pwonyo lubalo yo ma myero gulubi.

⁹ En telo jo mamwol me tiyo gin ma atir, dok pwonyogi wek guŋe gin ma en mito.

¹⁰ Yo pa Rwot ducu opoŋ ki mar ma pe lokke, ki gen, pi jo ma gigwoko gicikkene ki lok me cadenne.

¹¹ Pi ber me nyiŋi, ai Rwot, wek balla, pien dwoŋ.

¹² Dano mene mono ma lworo Rwot? Rwot bipwonye yo ma myero en olubi,

¹³ En kikome bibedo ki lonyo ma ri nakanaka, dok litinone bene gibicamo lobo.

¹⁴ Rwot bedo larem jo ma gilwore, dok bene en mi yo giŋeyo gicikkene.

¹⁵ Aneno bot Rwot kare ducu, pien en bigonyo tyena woko ki i obwo.

¹⁶ Lokke idwog bota, dok inyutta berri; pien doŋ adoŋ kena, dok can odiya woko.

¹⁷ Kwany cwercwiny woko ducu ki i cwinya, dok ilara ikwanya woko ki i lwak can ma atye iye.

¹⁸ Tam pi canna ki ayela ma atye kwede, ci iwek balla ducu.

¹⁹ Tam lukworra gitye adi, ma gidaga kun giger matek!

²⁰ Gwok kwona, dok ilara; pe iwek giket lewic i wiya, pien ariŋo alaro boti.

²¹ Mi berra ki cwiny ma atir ma atye kwede gugwoka, pien akuro in.

²² Ai Lubaŋa, lar jo Icrael ki i can megi ducu.