Jabuli 24 - Acoli Baibul

Kabaka me deyo

¹ Lobo kacel ki jami ducu ma tye iye gin jami pa Rwot; lobo kacel ki jo ducu ma gibedo iye bene mere.

² En con oketo lobo i wi nam, dok oketo te gutine ocuŋ matek i dye pii me nam matut.

³ Aŋa ma tye ki twero me ito malo i wi got pa Rwot? Aŋa ma twero cuŋ i kabedone maleŋ?

⁴ Ŋat ma tiyo gin ma atir, dok ma cwinye leŋ, ŋat ma pe miyo kwone me woro cal lubaŋa-gu, dok ma pe kwoŋo kwoŋ ki goba.

⁵ Rwot bimiye gum, Lubaŋa lalarre bimiyo en loyo kop.

⁶ Meno gin aye jo ma giyenyo en, gin jo ma gibino i nyim Lubaŋa pa Yakobo,

⁷ Wutiŋŋe, wuyabbe malac, wun dog cel! Wuyabbe, wun doggola macon, wek kabaka me deyo odony.

⁸ Aŋa ma kabaka me deyo? En Rwot matek ma tye ki twer, en Rwot matek ma loyo lewny!

⁹ Wutiŋŋe, wuyabbe malac, wun dog cel! Wuyabbe, wun doggola macon, wek kabaka me deyo odony.

¹⁰ Kabaka me deyo man en aŋa? Rwot me mony aye kabaka me deyo!