Jabuli 22 - Acoli Baibul

Koko me remcwiny ki wer me pak

¹ Lubaŋana, Lubaŋana, itenya woko piŋo? Piŋo ibedo ka mabor ma pe iromo lara, dok bene pe iwinyo ka acur acura?

² Akok boti dyeceŋ, ai Lubaŋana, ento pe igamo doga; akok boti dyewor bene, ento pe anoŋo kit yweyo mo.

³ Ento giketi i wi komker macalo ŋat, Maleŋ, in aye Lubaŋa ma jo Icrael gipako.

⁴ Kwarowa yam gigeni; gugeni, ci omiyo ilarogi.

⁵ Gukok boti, ci ilarogi; gugeni, omiyo pe gubedo ki cwercwiny dok lewic pe omakogi.

⁶ Ento an mera a kwidi, pe adano; jo ducu giŋala dok gicaya.

⁷ Jo ducu ma ginena giŋala aŋala, gicima ki lebgi, kun giyeno wigi.

⁸ Gin giwacci, “En omiyo kwone bot Rwot; wek Rwot olare, wek Rwot olare, pien cwinye yom i kome!”

⁹ In aye yam ikonya omiyo ginywala; i kare ma an pud latin lakere igwoka maber,

¹⁰ Cakke ma ginywala abedo ka jeŋŋe i komi, cakke i kare ma maa onywala iye in ibedo Lubaŋana.

¹¹ Pe ibed bor kweda, pien can tye cok; pe tye ŋat mo ma myero okonya.

¹² Lukwor mapol guruma woko macalo twoni, gin ducu guruma woko dyere, calo twoni ma komgi tek ma gua ki i lobo Bacan.

¹³ Giŋamo doggi malac i koma, calo labwor mager ma tye ka koko.

¹⁴ Tekka otum woko macalo pii ma gionyo i ŋom, cogona ducu guwotte woko ki i waŋ mwot; cwinya leny calo odok kic ma tye ka leny, tye ka leny ki iiya,

¹⁵ Tekka otwo woko calo tako mutwo, ki leba bene omoko woko i cwaka; imiya apoto piny i apwa macalo ŋat muto.

¹⁶ Iyo, dul pa jo ma gin lutim maraco gugura woko dyere, gicalo lwak gwogi ma gugura woko doŋ gucobo ciŋa ki tyena wo ko ducu,

¹⁷ Atwero kwano wel cogona ducu, ginena ma guciko waŋgi i koma;

¹⁸ gipoko ginarukana woko i kingi, gibolo kwir pi boŋona.

¹⁹ Ento in, ai Rwot, pe ibed ka mabor kweda! In Lalarra, rune ibin oyot ikonya!

²⁰ Lara ki i lak pala lucwan, lar kwona ki i teko pa gwogi!

²¹ Lara ki i dog labwor, kwany kwona wo ko ki i tuŋ twoni mager-gu!

²² Abitito pi gin ma itiyo bot utmegina; abipaki i dye lwak ma gucokke kacel:

²³ Wun jo ma wulworo Rwot, wupake! Wun likwaye pa Yakobo ducu wumiye deyo, wuwore, wun jo Icrael ducu!

²⁴ En pe ocayo can pa jo ma can opoto i komgi; iye pe dag neno cangi, ento owinyo kokogi, i kare ma gukok bote.

²⁵ Abipaki i dye lwak madwoŋ ma gucokke kacel; abicobo kwonna i nyim jo ducu ma gilwori.

²⁶ Jo ma can opoto i komgi gibicamo cam giyeŋ; ki jo ma giyenyo Rwot gibipake! Myero gibed ki kwo maber nakanaka!

²⁷ Rok ducu ma i lobo gibipo i kom Rwot; gibia ki i kabedo ducu gidwogo bote; kaka ducu me rok mapatpat gibibino ka wore.

²⁸ Rwot aye kabaka, en loyo jo me rok ducu.

²⁹ Iyo, jo ducu ma gin luwakke lobo-ni gibiguno piny bote; ki jo muto ma gibidok i ŋom gibiguŋo piny i nyime, jo ducu ma giŋeyo ni gibito.

³⁰ Yalwak me kare me anyim ducu gibitiyo bote; dano gibitito lok i kom Rwot bot yalwak ma lubogi,

³¹ kun gituco larre bot jo ma pud peya ginywalogi, ni Rwot aye ma olaro jone.