Jabuli 21 - Acoli Baibul

Pak pi lar ki i ciŋ lukwor

¹ Kabaka tye ki yomcwiny, ai Rwot, pien in aye imiye tek; dok opoŋ ki yomcwiny madwoŋ pi loc ma imiye.

² Ityeko miye gin ma cwinye mito, dok igamo doge imiye gin ma en olegi pire.

³ Iŋolo wiye ki mot mabeco me gum; iketo bene lalukana me jabu ma giliyo maber i wiye,

⁴ En olegi ni imiye kwo, ci imiye; imiye kwo ma ri nakanaka pi kare malac.

⁵ Deyone dit pi konnyi; imiye deyo ki dit me Loc,

⁶ Iyo, imiyo gum bedo i kome matwal; bedoni kwede miye yomcwiny.

⁷ Kabaka geno Rwot; pi meno pe gibidire cen, pi mar ma pe lokke pa ŋat Mamalo Twal.

⁸ Ibicwalo ciŋi imako lukworri woko ducu; ibimako jo ducu ma gidagi ki ciŋi lacuc.

⁹ Ka ibinen botgi, ci ibilokogi gidoko calo keno ma mac tye ka lyel iye. Rwot bimwonyogi woko ki kinigane; ci mac biwaŋogi woko.

¹⁰ Ibineko litino ityeko woko liweŋ ki i lobo, ibineko likwayogi woko ducu,

¹¹ Gipiro lok i komi kun giyubo me timi marac, ento kadi gibed ki yub me timo gin marac, yubgi pe bicobbe kakare.

¹² Ibitelo atummi ibayo atero kun imito icel waŋgi woko; ci ibimiyo gin ducu giriŋo woko,

¹³ Gidwori pi tekki, ai Rwot! Wabiwero wer kun wapako tweroni.