Jabuli 2 - Acoli Baibul

Kare me loc pa kabaka ma Rwot owiro

¹ Piŋo lurok gitye ka wo kacel? Piŋo rok mapol gipiro lok ma konnye pe?

² Lukergi ducu gijemo woko, ki lulocgi bene gipiro lok kacel, i kom Rwot ki i kom ŋat ma en doŋ otyeko wiro, kun giwacci,

³ “Wek wacodu nyorgi ma gutweyowa kwede-ni woko, dok wabolu twerogi me loc woko ki i komwa.”

⁴ Rwot ma obedo i wi komkerre i polo tye ka nyero; en ŋalogi aŋala.

⁵ En loko kwedgi ki kiniga, dok miyogi lworo ki akemone mager, kun wacci,

⁶ “An doŋ atyeko keto kabakana i wi Cion, ma en got mera maleŋ.”

⁷ Abitito cik pa Rwot, ma en owaco bota ni, “In latinna, tin doŋ atyeko nywali.

⁸ Legga, ci abimiyi lurok me bedo ginaleyani, ki lobo ducu bene bibedo meri.

⁹ Ibiloyogi ki odoo nyonyo, ibiŋidogi woko matitino macalo agulu pii pa lacwe agulu.”

¹⁰ Kombeddi doŋ wuwiny lokka, wun luker, wubed ryek; myero wuwiny pwony man, wun luloc me lobo.

¹¹ Wuti bot Rwot ki lworo ki myel kom,

¹² wurum coŋwu i nyime; wek kinigape omake i komwu miyo wuto woko i yo: pien akemo make oyotoyot mada. Gitye ki gum jo ducu ma giriŋo gilaro bote.