Jabuli 19 - Acoli Baibul

Ginaketa pa Lubaŋa

¹ Polo ki jami ducu ma tye iye ginyuto deyo pa Lubaŋa; dan polo bene nyuto tic me cine.

² Nino acel acel tuco pire bot nino ma lube, dyewor acel acel nwoyo tucone bot dyewor mukene wek oŋe.

³ Leb ma giloko pe, ki lokgi bene pe; dwangi won pe winnye.

⁴ Ento dwangi winnye teretere i wi lobo ducu, ki lok ma giloko owa i agikki piny. Lubaŋa oguro kema i polo pi cen,

⁵ ma bino macalo lanyom ma a woko ki i kicikane, macalo laco ma kome tek ma riŋo i ŋwec ki yomcwiny.

⁶ Tuc ki i acakki polo yo tuŋcel, woto rumo woko ducuo wa iagikkine; gin mo pe liweŋ ma twero kanne pi Iyetone.

Cik pa Rwot

⁷ Cik pa Rwot ber, dok tye atir; miyo kwo manyen bot dano; gin ma Rwot ociko tye me ada, miyo ryeko bot lumiŋ.

⁸ Pwony pa Rwot tye atir, yomo cwiny dano; cik pa Rwot tye maleŋ, miyo dano niaŋ maber.

⁹ Lworo Rwot ber, ci pe bigik matwal, ŋolo kop pa Rwot tye kakare, dok bedo atir ma romrom kare ducu.

¹⁰ Pigi tek ma myero gimak makato jabu, kato bene jabu ma giliyo maberre, Gilim gikato moo kic woko, kato bene kadi ki moo ma cwer ki i peda kic,

¹¹ Gimiyo ŋec bot laticci; ŋat ma ogwoko cikki limo mot madit.

¹² Aya ma twero neno balle kene? Lara ki i kom balla ducu mukanne.

¹³ Juka bene pe apot i bal mo ma obino pi cwiny me wakke; pe iwek oloya! Ci abibedo laboŋo bal mo i koma, abibedo ma pe atimo bal mo madit:

¹⁴ Mi lok ma a ki i doga ki tam ducu ma tye i cwinya obed ma in ipwoyo, ai Rwot, in gotta dok lakokka.