Jabuli 18 - Acoli Baibul

Wer pa Daudi pi lar ma Rwot olare kwede

¹ Amari, ai Rwot, pien in i tekka.

² Rwot aye gotta en cel gogona matek, en lalarra; en Lubaŋana, ki gotta, ariŋo alaro bote, en gwoka macalo kwot, en kalarrena matek; en geŋo ŋeya woko ci gwoka miyo abedo maber laboŋo ayela,

³ Akok bot Rwot, ci en lara ki i ciŋ lukworra, Pi meno myero gipak Rwot.

⁴ To otelo tolle ci otweya woko aduno, biamwonyi me to otwagge oruma woko dyere, kulu ma piine, ger ma neko dano ocorre woko i wiya limuk.

⁵ Tol Lyel odwala woko, owic me to bene orine woko i nyima.

⁶ I kare ma atye i can akok bot Rwot; akok gira bot Lubaŋa pi kony, Owinyo dwana ki i ot mere maleŋ, kokona pi kony odonyo i ite,

⁷ Cutcut lobo oyeŋŋe ma morre pe twerre, te godi bene ducu guyegge woko ma giyeŋŋe matek, pien kiniga onoŋo omako Lubaŋa.

⁸ Yito oduny okatti ki i ume, mac ma waŋ malyet okatti ki i doge, ma lodine bene olyel, olyel matek mada.

⁹ Oywayo polo odwoko cen, ci olor obino piny, kun piny macol mapek oryene i te tyene.

¹⁰ Oito i wi lakerubi ci otuk kwede, oriŋo madwir i dye yamo.

¹¹ Oketo piny macol orume dyere, kemane obedo pol mapek mupoŋ ki pii.

¹² Pee ki lodi mac ma lyel gunen i piny ma ryeny maleŋ ki i nyime, otuco dye pol macol licuc-ci woko.

¹³ Rwot omiyo polo omor, dwan ŋat Mamalo Twal owinnye, ocwalo pee ki lodi mac.

¹⁴ Obayo aterone, okeyo lumerok woko; omiyo lutkot owil, ci orwadogi woko piny.

¹⁵ Dye nam opokke, tere onen, guti me te lobo bene odoŋ twolo, i kare ma ijukogi, ai Rwot, i kare ma ikutogi ki yweyo ma okatti ki i umi.

¹⁶ Rwot ocwalo ciŋe piny ki i polo, ci omaka, oywaya okela woko ki i pii matut.

¹⁷ Olara ki i ciŋ lakworra matek, olara ki i ciŋ jo ma gidaga, pien onoŋo gitek mada giloya woko.

¹⁸ Gupoto i koma i kare ma can obwoya matek, ento Rwot aye obedo ka kenya.

¹⁹ Okwanya woko okela i kabedo malac; olara pien onoŋo ayomo cwinye.

²⁰ Rwot omiya bakacic pien oneno ni kita atir, oculla muporo leŋcwinya;

²¹ pien abedo ka lubo cik pa Rwot, pe apokke woko ki bot Lubaŋa pi bal mo.

²² Alubo cikke ducu, pe aŋak aweko gin ma en ociko.

²³ Pe atimo bal mo i nyime, dok agwokke mada pe atimo bal alii mo,

²⁴ Mumiyo Rwot omiya bakacic pien oneno ni kita atir, oculla muporo leŋcwinya ma abedo kwede i nyime.

²⁵ Rwot, in lagen bot jo ma lugen; bot ŋat maber ma pe ki bal inyutte bote bene calo ŋat maber ma pe ki bal.

²⁶ Cwinyi leŋ i kom jo ma cwinygi leŋ, ento iger i kom dano ma tamme ogom,

²⁷ Ilaro jo mamwol, ento jo ma luwakke idwokogi woko piny.

²⁸ Iyo, in aye ma icwinyo mac tarana; Rwot Lubaŋana aye menya ki colpiny.

²⁹ Iyo, atwero tyeko buca mony kulu kaikonya; pi teko pa Lubaŋana miyo apye akalo wi cel.

³⁰ Lubaŋa man, gin ducu ma en tiyo tye atir, lok pa Rwot ma en cikke me tiyo bedo ada; en tye macalo kwot pa jo ducu ma giriŋo gilaro bote.

³¹ Aŋa ma Lubaŋa, kono Rwot kene? Aŋa ma got, pe Lubaŋawa aye keken gire?

³² En aye Lubaŋa ma oruka ki tek, en aye ma omiyo awoto ki kuc.

³³ Oketo tyena obedo macalo tyen til, ociba malo ka ma acuŋ iye matek.

³⁴ En pwonyo ciŋa pi lweny, mumiyo atwero gomo wa atum mola,

³⁵ Doŋ ityeko miya kwot me larri, kun ijola ki ciŋa lacuc; kony ma in imiya omiya adoko dit.

³⁶ Imiya kabedo malac ka ma awoto iye ducu, omiyo tyena pe ocer,

³⁷ Aryemo kor lukworra ci amakogi wako iyo; pe alokke adok cen nio, ka atyekogi ducu,

³⁸ Acobogi woko pil ci gupoto piny ka tyena; ma pe doŋ gitwero a malo.

³⁹ In aye iruka ki tek pi lewny; imiyo lulweny i koma guto gutum woko ka tyena.

⁴⁰ Imiyo lumerokka guloko ŋegi bota, imiyo atyeko jo ma gidaga woko.

⁴¹ Gukok pi kony, ento ŋat mo pe ma olarogi, gukok bot Rwot, ento en pe ogamo doggi.

⁴² Adinogi woko gudoko macalo apwa me yom ma yamo kolo; anyonogi macalo coto ma tye i yo gudo-gu.

⁴³ Yam ilara ki i kom rok mapol ma gilwenyo kweda; iketa abedo ladit ma loyo rok ducu; jo ma yam pe aŋeyogi gudoko jona ma an aye aloyogi.

⁴⁴ Cutcut ka lurok giwinyo pira ci gubino bota ma gimwolle amwola, ci gilubo cikka.

⁴⁵ Tekcwiny orwenyo woko ki botgi, gua ki ka ma gukanne iye gubino ma komgi myel amyela.

⁴⁶ Rwot tye kwo; gipwo gotta, gipil wi Lubaŋa ma en lalarra.

⁴⁷ En Lubaŋa ma omiya aculo kwor i kom lukworra, dok ma obwoyo rok mapol, omiyo gubedo i te Locca;

⁴⁸ ci olara ki i ciŋ lumerokka; iyo, ipilo wiya makato lukworra, ilara ki i cin lulweny ma lubwami,

⁴⁹ Pi meno abikori i kin lurok, ai Rwot, dok abiwero wer me pako nyiŋi.

⁵⁰ Lubaŋa miyo deyo me loc madit bot kabakane, dok nyuto mar mere ma pe lokke i kom danone ma en oyero ka giwiro, bot Daudi ki likwaye ducu matwal.